Tourism Department huaihawt ni thum awh tur Anthurium Festival, Reiek Tourist Resort a neih mek chu a ni hnihna vawiin khan hman niin, Parliamentary Secretary Pu TT. Zothansanga chu khuallian chan changin a hmanpui a. Mizorama cham mek Assam Rifles Director General Lt. Gen. R.K. Rana leh sorkar laipuia Ministry of Home Affairs atangin Pu J.P.N. Singh, Director (North East II)-te pawh an tel a ni.

Tourism Minister puitu Parliamentary Secretary Pu TT Zothansanga chuan Mizoram sik leh sa boruak nuam tak hmang tangkaia, Zoram mipuite leh khualzinte tana hun hlimawm tak hman theihna Anthurium Festival siam a ni chu tha a tih thu a sawi a. Tourism Department chuan hmalakna tha tak tak an lo siam tawh thu leh, tourism lama tui tak minister an neih thu tarlangin, tourist lodge, highway restaurant leh khualzinte tana chawlhna hmun chi hrang hrang Mizoram chhungah 42 a awm tawh thu leh hawn mai theiha peih tawh leh sak mekte a awm tih Parliamentary Secretary chuan a sawi a. Hotel management lam zir tura ram danga pawisa tam tak tak senga kal ngai tawh lovin thalaite train chhuahna tur, international standard-a siam Institute of Hotel Management, Bung Bungalow-a sak pawh zawh tawh niin, reiloteah he zirna in hi a hawn theih tur thu Khuallian hian a sawi bawk.

Vawiin hun hi Pu Biakthanmawia Pautu, Joint Director, Tourism Department chuan a kaihruaiin, Pi Noel Pari, Deputy Director, Tourism Department chuan lawmna thu sawiin hun hi a hawng a. Vawiin hian MCO, Bru Cultural Troupe - Damparengpui, Lai Cultural Troupe-Lawngtlai, Mara Cultural Troupe- Tuipang V, Chakma Cultural Troupe – Rajiv Nagar, Reiek Middle School, P.C Girls School, ICFAI University leh Mizo Dance Camp ten lam chi hrang hrang entirin, zaithiam chi hrang hrangin zaiin mipui an awi a. Intihhlimna leh intihsiakna hrang hrang a awm bawk.

Anthurium Festival ni thumna leh a kharna hun chu naktukah neih leh a ni anga, Tourism Minister Pu John Rotluangliana chu khuallian tura beisei a ni. Festival hi a duh apiang tan a thlawna tlawh theih a ni.