Tourism Department in an huaihawt thin Anthurium Festival chu kumin 2015 pawh hian neih leh ngei tum a ni a. Hemi chungchang sawiho turin vawiin khan Pu John Rotluangliana, Tourism Minister hovin a office ah committee neih a ni a. Pu T.T. Zothansanga, Parliamentary Secretary leh Pu V. Lalremthanga IAS, Secretary Tourism leh Tourism officer te committee ah hian an tel a ni.

Committee kaihruaitu Pu John Rotluangliana chuan kum dang a Anthurium Festival lo neih thin dan te sawiin hmanna hmun thin Reiek lam chuan mipui zo lo deuh a hriatna avangin kumin ah chuan Lengpui hmun a Mini Sports Complex chu Festival neih nan hian ruahman a nih thu sawiin State Level Anthurium Organising Committee din thuai a tul thu leh a chhimtu mipuiten an hlimpui theih ngei tura ruahman theih nise, heta tana mamawh leh tul dang te sawiho a tul thu a sawi.

Committee chuan Anthurium Festival chu 1st October, 2015 - 3rd October, 2015 ah neih tura ruahman in Lengpui Mini Sports Complex chu tinzawn nghal in Organising committee tur pawh rel fel nghal a ni a. 2nd September, 2015 ah hian committee neih nghal a ni ang a chak taka hmalak nghal tura rel a ni.

Vawiin committee ah hian Mizoram hmun hrang hrang a Tourist Lodge te chu enkawltu tur mi an awm loh avangin sorkar tan a hlawk lo a, Privatise mai nise tih chu Mizoram sorkar thutlukna a nih thu sawi a ni a. Tourist Lodge pali (4) Kolasib District ami Buhchang, Aizawl District ami Khanpui leh Sakawrdai te Lawngtlai District a Paithar te chu tunah hian mimal kutah dah a ni tawh a.Tourist Centre hrang hrang dang Vairengte, Zonuam, Hmuifang, Chhiahtlang, Thenzawl, Bairabi, Thingdawl, Saipum, Saitual leh Sairang hmuna Tourist Center te hi enkawl turin tender hmanga chhan theih tura ruahman mek a nih chu Committee chuan hmalak zel dan tur an rel nghal a ni.