Vawiin chawhma dar 10:30 khan Mizoram Police leh Shakti Vahini tangkawpin an buatsaih, 'Anti - Human Trafficking' chungchanga ni khat awh training chu DGP Pu Thianghlima Pachuau IPS chuan Aijal Club Conference Hall-ah a hawng a.He training-ah hian Police Officer, ASI atanga Dy. SP chin mi 50 an tel a, Shakti Vahini-a mithiamten zirtirna an pe a ni.
Training hawnna-ah hian Khuallian Mizoram DGP Pu Thianghlima Pachuau IPS, chuan thusawiin Human Trafficking hi Mizote’n kan hriatthiam tawk loh avangin kan lo ngaihthah thin niin a lang a, tunah erawh chuan kan lo thangharh ta a, a ti a. Mipuite chu fimkhur zel tura a fuih rualin Khuallian chuan Police Officer rualte chu human trafficking tuartu (victim)-te chu thil tisualtu ang maia dawngsawng lo tur leh an nihna leh chanchinte pawh puangzar lova nunthar an tan theih nan lainatna nena tanpui thin turin a chah bawk.
He nikhat awh Training hawnna hi DIG (Trg) Pu C. Laldina IPS, in a kaihruaia. DIG (CID) Pu Joseph Lalchhuana IPS, chuan Mizoram in Human Trafficking-a lo hmachhawn ve tawh dante sawi langin Police te pawimawhna uar takin a tarlang bawk.
Police Officer-te zirtirna petu, Shakti Vahini-te hi mihring hmanga sumdawnna (Human Trafficking) dotu pawl (NGO), Delhi a hmunpui nei an ni a. Tunhma a Mizo Hmeichhiate buma India ram khawpui lian hrang hranga hralhte chhanchhuah kawnga Mizoram Police-te lo puitu pawl tangkai tak an ni.
