District Child Protection Unit Committe chu an chairman Pi Lalbiaksangi District Bawrhsap hovin vawiin khan D.C Conference Hall, Mamitah an thukhawm.

Meeting-ah hian Pu Lalrinhlua, District Child Protection Officer chuan kum 2015-2016 chhunga hmalakna hrang hrang te a sawi a, DCPU te hian 2015-2016 chhungin Awarness vawi 61 nei tawhin naupang harsa zual mi 78 te chu Sponsorship scheme kaltlangin thlatin tanpuina pek an ni a, Child Welfare Committee te hian Case 101 neiin, JJB in case 32 an nei bawk.

Mamit-ah hian Home pahnih Shelter Home pakhat leh Children Home pakhat awm mekin, Observation Home hi hawng thuai tura hmalak mek a ni bawk. Naupang chunga Mipat/Hmeichhiatna chungchangah victims te hi uar lehzuala zawka counseling pek theih dan tur sawi ho a ni bawk.

Child Protection Nodal Teacher training chu Zawlnuam RD Block huamchhungah a hma thei ang bera neih ni se tih a ni a, Mamit khua leh a chhehvel leh Reiek RD Block ah zirtirtu 134 te hnenah training hi pek a lo ni tawh a ni.