April thla hi Malaria Do Thla a nih angin vawiin khan Health & Family Welfare Department hnuaia State Vector Borne Diseases Control Programme chuan he hun hawnna pual inkhawm I&PR Auditorium-ah an hmang a, Dr.K.Ropari, Principal Director, H&FW chu khuallian a ni.

Dr. K. Ropari chuan Malaria venna kawnga tanlak kawngah mipuiten theihtawp kan chhuah a pawimawh zia a sawi a. Khua leh veng tina ASHA te chhawr tangkai a pawmawh zia sawiin Malaria Dona Programme chu mahni ta anga ngai tur leh theih ang tawka tha thawh turin kalkhawmte a chah bawk a ni.

Anti Malaria Month hawnna inkhawm hi Dr. Rohmingthanga Ralte, Director of Health Services in a kaihruai a. Dr. Rohmingthanga'n kalkhawmte lawmna thu a sawi zawh hnuin Dr. C. Zarzoliana, State Programme Officer, SVBDCP hnen atangin Malaria chungchanga Mizoram dinhmun Powerpoint Presentation hmanga ngaihthlak leh thlir ho a ni a. Dr. K.Lalbiakzuala Mission Director, NHM leh Mary Laltanpui ASHA te hnen atangin thusawi ngaihthlak a nih bakah Drama leh Malzai thlir leh ngaihthlakho a ni bawk.

Dr. C. Zarzoliana chuan report pe in Malaria Dona Programme hi kum 1953-ah National Malaria Control Programme (NMCP) vuah a neih tan a nih thu te, chumi hnu-ah kum —2002 khan National Vector Borne Diseases Control Programme (NVBDCP) ti a thlak a nih tak dan te sawiin Vector Borne Diseases hnuaiah hian heng natna chi ruk Malaria, Filariasis, Kala-Azar, Dengue, Japanese Encephalitis (JE) & Chikungunya te hi khung an nih thu leh Vector Borne Diseases Control Programme hi kum 2005 tangin Mizoramah kalpui tan a ni a ti a. Malaria natna chauh an khawih hnu-ah kum 2012 atangin Dengue leh Chikungunya natna te hi telh chhoh leh a nih tak thu a sawi bawk. Report-a a tarlan danin Kum 2014 chhung khan Malaria vei ni a rinhlelh mi 330882 te thisen exam niin chung zinga mi 23105 te chuan Malaria an vei a. Malaria thihpui mi 31 an awm bawk.

Dr. R. Lalbiakkima, Director, HME chuan lawmthu sawiin hun hnung a khar a ni.