Vawiin chawhma dar 11:00 khan I&PR Auditorium, CHANEM Building ah Mizoram State Tobacco Control Society, Champhai buatsaihin Champhai khawpui chhunga NGO leh Kohhran hruaitu hrang hrangte pualin Anti-Tobacco Awareness Campaign neih a ni.
He sawihona leh zir hona hun Pu B. Zamkhawnanga, Superintendent Champhai DC Office kaihhruaiah hian mithiam thlanchhuah hrang hrang ten vaihlo leh a kaihhnawih hman that lohna leh mihring nun leh taksa a khawih chhiat dan bakah vaihlo khuahkhirhna dan chungchangte zirho leh sawiho nghal a ni.Dr. Vanlalhlua, Member Secretary chuan “Vaihlo in kan taksa a khawih chhiat dan” tih thupui hmangin power point presentation a pe a. Mizo zingah vaihlo chuan bu a khuar nasat tawhzia sawiin, India leh khawvel huap pawhin Mizoram chu vaihlo leh a kaihhnawih ti nasa kan ni tih a tarlang a. Mizoram chu India ramah vaihlo leh a kaihhnawih ti nasa kan ni tih sawiin a sim kawngah pawh sim tum tlemna ber a ni tih a sawi bawk.Mimalin mei a zuk chuan a mimal zalenna a ni a, mahse midang bulah leh puipunna hmuna a zu a nih erawhchuan dan bawhchhia a ni a, hrem theih a ni a ti. Mizoram chu vaihlo leh a kaihhnawih ti nasa kan ni chungin vaihlo that lohna lama inzirtirna kalpui a nih hnuah chuan nasa takin Mizote zingah ngaihven a hlawh piah lamah puipunna leh phal lohna hmuna ti thin an tlem sawt hle tih sawiin, nasa lehzualin tan lakho erawh a tul thu a sawi a ni.
Mary Lalthansangi Sailo, District Co-ordinator chuan “Vaihlo Khapna dan (COPTA)” chungchang chipchiar takin power point presentation hmangin a pe bawk a. Vaihlo leh a kaihhnawih hrang hrang he Dan in a khuahkhirh leh hman phal loh a nih chin te kalkhawmte hnenah a hrilhfiah a.
Lalremliana, Secretary, ISTHM Mizoram Chapter chuan vaihlo leh a kaihhnawih chungchang te, hemi kawnga an hmalak dan leh hmalak zui zel a tul dan te bakah tan ho a tul dan te chipchiar leh ngaihnawm takin a sawi a. Hemi hnu hian kalkhawmte chuan vaihlo leh a kaihhnawih hman chungchanga inhrilhhriat a tulna te, a khapna dan leh mipuite hnenah hmalak zui zel dan tur chungchangte inpawhtlang takin an sawiho zui bawk a. Lalnunmawia, Principal Govt. Champhai College chuan lawmthu sawiin he inkhawm hi a tin ta a ni.
