Vawiin khan Anti- Tobacco Squad, Aizawl District te chuan Zemabawk ah kalin puipunna hmun pawimawh tak tak TB Hospital, RIPANS, Aizawl Municipal Council Office, Bus Terminal, Taxi Stand, Restaurant etc.ah te kalin meizu an awm leh awm loh te leh vaihlo khuahkhirhna dan (COTPA) in a phut angin No smoking signage leh Complaint board te tar ani em tih an enfiah.

Zirna Inah te kalin Signage leh Complaint board mai bakah Section 6 (b) COTPA in a phut angin "School compound atanga Yard 100 (Feet 300) huam chhungah Vaihlo leh a kaihhnawih thil reng reng zawrh khap tlat a ni. A zuar lui chu Cigarettes and Other Tobacco Product Act (COTPA) 2003, Section - 24 na hmanga Rs. 200 /- thleng chawitir theih an ni" tih thu inziak (signage) a awm em tih an enfiah.

Vaihlo leh a kaihhnawih zuartute hnena Section 6 (a) COTPA in a phut angin kum 18 hnuailam hnenah vaihlo leh a kaihhnawih hralh phallohna thu inziak (signage) an tar em tih an enfiah bawk. Heng bakah hian taxi stand leh bus stand ah te kalin driver te hnenah an motor chhunga meizuk khap tlat turin an hrilh a, meizuk phal lohna stickers te pawh an pe bawk a ni.

Vawiin a Anti Tobacco Squad kal chhuak te hian an kalna hmunah hian No smoking signage te an tar tha hle tawhin an sawi a meizu lai man leh chawitir an neilo bawk a ni.