Pu Vanhela Pachuau, Chief Secretary kaihhruaina hnuaiah vawiin khan Mizoram state E-Governance Apex Committee Meeting chu Chief Secretary Conference Room-ah neih a ni.

He meeting-ah hian Information & Communication Technology, Mizoram hotuten Mizorama E-Governance neih tura hmalakna chungchang leh IT Connectivity chungchanga hmalak dan leh harsatna an tawhte power point presentation pe-in an sawifiah a. Vawiina Apex Committee thutkhawmnaah hian National E-Governance Programme hnuaia hmalakna pawimawh heng a hnuai amite hi sawihovin Mizoram-a hlawhtling taka hman anih theihna tura tanlak ho dan tur an ngaihtuah a ni. Chungte chu - Capacity Building & Training, State Wide Area Network (SWAN), State Data Centre (SDC), E-District, Common Service Centre(CSC)/Mizoram Online, State Service Delivery Gateway (SSDG), State Portal (SP), department hrang hrang tana website leh Mizorama connectivity-a harsatna awmte.

Kumin May thla chhung hian Mizoram State chhunga hmun hrang hrangah CSC/Mizoram Online 136 hawn beisei a ni a, Aizawl khawpui chhungah CSC/Mizoram Online 37 hawn tum a ni. Heng Mizoram Online kaltlang hian electric bill, tui bill leh bill dangte awlsam leh diktaka pek leh vawn theih tura beisei a ni.