Vawiin khan Dr.Franklin Laltinkhuma, Deputy Commissioner, Aizawl District kaihhruaina hnuai ah Office ah Aizawl District Level Anti Tobacco Task Force leh Aizawl District Anti Tobacco Squad te chuan Joint Meeting an nei. He meeting hi Dr. Rana J. Singh, Technical Adviser, The Union South East Asia, New Delhi chuan a hman pui.

He hunah hian chak lehzuala vaihlo khuahkhirhna dan (COTPA) kalpui zel a nih theih dan tur sawiho a ni a, hmalak tawhna hrang hrangte thlir letna hun neih a niin memberte chuan hmasawnna lawmawm tak a awm thu an sawi a, hmalakna tur pawh a la tam thu sawi ho a ni bawk.

He hunah hian vaihlo khuahkhirhna dan hnuaia section hrang hrangte sawihona neih a ni a, vaihlo khuahkhirhna dan hnuai a Section 4 (puipunna hmun reng renga meizuk khapna dan) te, Section 5 (Vaihlo fakmawina lam reng reng khapna dan) te, section 6-a (vaihlo zuar reng rengin an zawm tur kum tling lo hnena vaihlo hralh khapna dan leh an thil tar ngei ngei tur) te, Section 6-a (vaihlo leh a kaihhnawih reng reng zirna in atanga Feet 300 (Yard 100) biala zawrh khapna dan leh zirna in reng reng in zrina in a langsar lai ber a vaihlo zawrh phal a ni lo tih tarlanna thuziak) te leh section-7 (vaihlo leh a kaihhnawih bawm reng reng a Health Warning tar) chungchangte sawihona hun neih a ni. Vaihlo khuahkhirhna dan hnuaia section hrang hrangah te hian chak lehzuala hma lak a ngai hle tih report a ni a.

He hunah hian naktuk a Campaign for Tobacco Free North East – Mizoram Launch neih tur chungchang pawh sawiho a ni bawk. Aizawl District Anti Tobacco Squad Report in a tarlan danin kum khat chhung (April 2012 tanga March 2013) thleng in puipunna hmuna meizu mi 131 man an ni tawh in dan angin pawisa chawitir thin an ni tih tarlan a ni bawk.