Vawiin khan Lunglei Baptish Higher Secondary School te chuan an school atanga Matriculation Exam Result 2013 a Top ten a lang J.Vanlalramthanga leh Pc Lalhruaitluangi te chawimawina hun Tucker Hall, Serkawn ah an hmang.

Chawimawina inkhawm ah hian Khuallian Pu Joseph Lalhimpuia ,Vice-chairman , HPC,Lunglei chuan thusawiin Lunglei atanga Top ten pahnih(2) awmte chu a lawmpui thu a sawi a,zirlai hlawhtlinna la chang lo te pawhin theihtawp chhuah a, tan la zel turin a fuih a. Baptish Higher Secondary school ten an Motto ‘Utmost for the Highest’ chu hmang tangkai a,theihtawp chhuah a, Pathian rinchhan a an beih chuan hlawhtlinna hmu turin tuman an dang thei lo a ni a ti. Tun kum hnih thum kalta ah MPSC tling mi 159 zing ah Lunglei District atangin mi 18 an lang a ,chu chu za zela 11.32 a ni a, tan kan lak a ngai hle a ni, a ti.

Vawiin a Matric Pass te chawimawina ah hian hlawhtling tate zawng zawng lawmpuina thil pek vek an ni a,BHSS atang hian candidate 61 awmin ,pakhat a fail a,za zel a 98.36 an pass a ni. Top ten a 5-na J.Vanlalramthanga leh 6-na Pc Lalhruaitluangi te hi pawisa fai Rs.5000/- ve ve pek an ni bawk. Vawiin BHSS Top ten a langte chawimawina inkhawm hi Pu Lalhmingmuana ,Principal BHSS in a kaihruai a ni.