Chief Minister Pu Lal Thanhawla chuan vawiin khan Serchhip JN Hospitalah National Programme for Control of Blindness (NPCB) sum hmanga sak, mit entirna in khum 10 awmna ‘10-Bedded Eye Ward’ a hawng.

Hawnna inkhawm Chief Medical Officer’s conference rooma buatsaihah Chief Minister chuan mit entirna hmun building tha tak hawn theih a ni chu rahbi thar pawimawh tak kan tuk a ni a, a lawmawm hle a ni, a ti a.A chhawrtu tur te hi a neitu kan ni a, a enkawlna leh a thianghlim thuah mawh kan phur a, a thar laia a fai ang hian fai taka vawng thianghlim reng turin mipuite a chah a ni. Pu Lal Thanhawla chuan Mizote hi ringtu inti, ei leh bara intodelha, hrisel ber awm tak, thlahnih daih pawh tharchhuak zo lo leh hrisello ber kan ni hi kan inbihchian angai hle a ni, a ti a. Hnam intodelh leh hnam ropui ni tur chuan kan taimaka, kan hrisel angai a ni tiin, hrisel tur chuan kan ei leh inah kan fimkhur a, kan hriselna tichhe theitu lakah kan fihlim a tul a ni, a ti a. Chuvangin kan khawtlang nun leh kan kalphung hi kan thlak danglam angai hle a ni, a ti. Doctor leh nurse te pawhin an mi enkawlte hnenah zuk leh hmuam that lohna hrilhhre thin turin a chah bawk a ni .

Hospitala damlo te kan kan danah Mizote hian inbihchian tur kan nei a ni a tiin, Chief Minister chuan damlo kan kanate biak kher kan tum thinte leh titina hmun ang maia kan hmang thin hian damlo te an nat belh phah fo a ni a ti a, zir tur kan ngah hle a ni, a ti a. Kan zavai hian a chhelai siam tha tura koh vek kan ni, a ti.

Chief Minister tawiawmtu Pu P.C.Lalthanliana, Minister of State for Social Welfare pawhin thusawiin, Serchhip chu Mizoram hmun laili ber awm a ni a, bialtu MLA Chief Minister Pu Lal Thanhawla hian heta tang hian rualkhai thei ang berin Mizoram hmasawnna a kalpui a, thingtlang kilkhawr ber pawh tlawh peihin Chief Minister taima ber leh rem hre ber nia a hriat thu a sawi a. Tun an sorkar chhung ringawt pawh hian Serchhip hmel chu nasa takin a danglam a ni, a ti.

Inkhawmah hian Pi Esther Lalruatkimi, Secretary, Health & Family Welfare in inlawmna thuchah a sawi bawk a ni.

Eye Ward hawn tak hi NPCB fund atangin Rs. 67,78, 000.00 senga sak a ni a. Mizopa chhiara chhawng thum a sang, damlo mutna tur khum 10 awmin, Operation Theatre (OT), consultation room, inthiarna, technical room leh conference room te a awm bawk a. Khawl hman tur Slit lamp, B Scan Ultrasound, Applanation Tonometer, SICS set leh a dang Rs.8.5 lakhs man tunah hian chah mek a ni bawk. Doctor leh nurse te pawh dah fel tawh a ni.

Chief Minister Pu Lal Thanhawla hian tukin zingkar khan Serchhip Bukpui a 132 KV Sub Station thuam that leh chei that mek chu a hmunah a en a.He sub stationa transformer tih loh, a khawl thenkhat circuit breaker, current transformer, lighting arrestor, isolator leh control and relay panel te chu a thar veka thlak an ni. Chief Minister hi Pu J.H.Malsawma, EE (P&E) in a tawiawm a ni.