World Malaria Day chu vawiin khan State Vector Borne Diseases Control Programme (SVBDCP) leh Christian Medical Association of India (CMAI) buatsaihin Health Directorate Conference Hall, Dintharah Health Minister Pu Lalrinliana Sailo hovin an hmang.
Pu Lalrinliana Sailo chuan Health Department hmalakna hlawhtlinzia lanna langsar tak pakhat chu kum khata Malaria vanga nunna chan an tlem tial tial hi a ni tiin he Department a bikin State Vector Borne Diseases Control Programme a thawktu te chungah lawmthu a sawi. Malaria dona kawnga Department-in hmachhawp a siam, kum 2017-ah chuan mi 1000-ah malaria vei pakhat aia tamlo tal thlentir tum te, kum khata thisen za a sawm tal exam tum te tarlangin Minister chuan heng ti hlawhtling tur hian mipui mimir thawhpui thiam a tul takzet dawn a, chuvangin Department a thawktu zawng zawng chu mipui zirtir kawngah te, thisen lak leh malaria hrik do kawng zawng zawngah theihtawp chhuah zui leh zual turin a fuih a ni.
He programme ah hian Dr Rohmingthana, Jt. Director (Family Welfare) chu Chairman niin Dr F Lallianhlira, Jt. Director (Malaria) chuan Mizorama Malaria dinhmun a sawi a. Kumin January - March thla chhungin Sikserhvanga thi mi 2 an awm tawh thu te, thisen exam 20147 atangin mi 767 ah Malaria hrik hmuh anih thu te, heta mi 709 te chu Malaria PF an nih thu tea tarlang a. April thla hi Sikserh Do Thla (Anti-Malaria Month) a puang a nih thu leh Sikserh laka inven leh inrin a pawimawhzia a sawi bawk.
Kumin hian CMAI te’n World Malaria Day denchhenin Painting competition, Govt. Middle School leh Kohhran Schoolah te buatsaih a ni a, lawmman te hi Pu lalrinliana Sailo chuan a hlan a ni. David Lianchungnunga, DIET Practicing School chu pakhatna niin Lallawmkimi, Govt. Ramhlun South Middle School chu pahnihna a ni a, pathumna chu Lalrozami PC Girls School a ni.
World Malaria Day hi World Health Organisation chuan kum 2007 atangin a hmang tan a. Mizoramah chuan kum 2010 atang khan hman tan a ni. World Malaria Day kal tlanga WHO in a tum chu Malaria laka invenna leh dona kawnga investment leh political commitment thuk zawk neih theih nan a buatsaih a ni. Hemi bakah ram hrang hranga mithiamte leh donorte inhmukhawmin, an tawnhriatte, thiamna tharte leh hmalakdan tur tha berte sawi hova in chhawmdawl turin hun an hmang thin.
WHO atanga data hmuhtheih chinah kum 2011 a khawvel huapa Malaria natna vei chu mi 86,84,85,568 an ni a, Uganda ah vei an tam ber awm in mi 1,18,24,484 zetin Malaria an vei a, India chu rank 18 na niin mi 13,10,367 in Malaria an vei a ni. Malaria avanga thi hi khawvelah 1,06,820 an awm a, Republic of Congo ah thihna tam berin mi 23,748 an thi a, India chu 23 na niin Malaria vangin mi 753 an thi a ni.
