Mizoram District pariata sem darh turin vawiin khan INSPIRE Award chu Education Minister Pu Lalsawta’n SCERT Conference Hall-a inkhawm buatsaihah a vailiam.
He inkhawm SCERT Jt. Director Pi Sangthanmawii kaihhruaiah hian Education Minister Pu Lalsawta chuan thusawiin Science lama zirlaite inelna thianghlim leh an phurna tur zawnga SCERT-in INSPIRE Programme a vawng nung zel chu a lawmawm hle a ni, a ti a. Mihring nuai 10 awrh chauh chenna Mizoramah Matric leh a chunglam hna hmulo inziaklut mi singthum chuang an awm a, sorkarah hna a van tawh avangin ram chhung leh ram pawn company lian zawka thawk thei tura an thiam a pawimawh a ni, a ti. Chief Minister hmalakna a din Mizoram Skill Development Society te; a hmalakna avang bawka Mizoram sorkar leh Ministry of Overseas Indian Affairs (MOIA) te, International Organisation for Migration (IOM) te, Cambridge University leh ASPIRE bakah Edexcel te thawhhona chuan Mizo thalai te ram pawn company liana hnathawk thei tura a chherchhuah ngei Education Minister chuan a beisei bawk.
Innovation in Science Pursuit for Inspire Research (INSPIRE) Award hmang hian zirlai ten an naupan tet atanga Science ngaih hlutna chang an hriat theihna turin zirlai te hnenah sumfai lawmman pek thin an ni a. Hlawm lian tak tak pathumah thenin Scheme for Early Attraction of Talent hmangin pawl sawm Board Exam-a titha zual hnenah cheng 5000 pek thin an ni a; hlawm hnihna Scholarship for Higher Education chuan Bachelor leh Master degree zir mek, kum 17 leh 22 inkar te hnenah kum tin scholarship a buatsaih sak thin a; a hlawm thumna Assured Opportunity for Research Careers hnuaiah kum 22 atanga 32 inkar research bei te hnenah sumfai chhawmdawlna a ruahman thung.
Kuminah hian Mizoram pumah INSPIRE Award dawng thei tur zirlai 802 an awm a, Aizawl District-ah 234; Lunglei District-ah 131, Saiha District-ah 15; Lawngtlai District-ah 106, Champhai District-ah 184, Serchhip District-ah 77, Kolasib District-ah 34 leh Mamit District atangin zirlai 21 an ni.
