Vawiin chawhma dar 11 khan Treasury Square a ATM Booth chu Pu J.H. Rothuama, Minister Land Revenue & Settlement chuan Mizoram Cooperative Apex Bank Ltd. hmasawn zelna avanga lawm thu sawi pahin a hawng.

Mizoram Cooperative Apex Bank Ltd. chuan tunlai technology changkan rual hian Banking transaction te pawh Bank dang ang bawk a tihchangtlun a duh ve a, tan a la nasa hle a.

A hmasa in Software hman lai chu a changkang zawk leh a thar a thlak a ni a. Tunah chuan software thar chu Aizawl khaw chhung Main Branch, Dawrpui Branch, New Market Branch, Bawngkawn Branch leh Centenary Branch (Mission Veng) ah hman a ni tawh a. He software thar atan hian HMA STARware Pvt. Ltd Chennai te nen tie-up arrangement neiin Pilot Project angin Main Branch leh Dawrpui Branch ah May 2010 atangin hmalak tan a ni a.

He software thar ah hian ABB (Any Branch Banking) leh ATM te hi kalpui tura ruahman a ni. Heng atana tul Hardware leh software te hi lei chhoh zel a ni a. Connectivity atan BSNL leased line dil a niin anni hian theihtawp chhuahin an buaipui a. Tunah hian Central Server ah thlungkhawmin Aizawl khawchhunga branch panga (5) te leh ATM hi thlungzawm a ni ta a ni. ATM khawl hi NCR company siam a ni a, mipuite mamawh a phuhruk ngei an beisei.

Aizawl pawn lama an Branch te computeriesd tur pawhin hmalak chhoh mek zel a ni a. Hma thlirah chuan reilote chhunga Branch zawng zawng computerized tura beisei a ni a. Branch zawng zawng TBA (Total Branch Automation) kalpui anih hnuah hian a remchan anga hma la zelin Core Banking Solution (CBS) lamte pawh an hawi chho dawn a ni.