Sorkar hmasawnna kal chho zel avangin Civil Secretariat chu Ministry hmasa tawp lam, kum 2008 khan Treasury Square atangin New Secretariat Complex-ah sawn alo nih khan Office hnathawkte leh mipui mamawhna hriain a theih ang angin Bus service tir a ni a. October 2009 atang phei kha chuan private bus pathum (3) (City Bus) chu pakhat thla khata Rs. 30,000/- hisap in hire a ni. Secretariat Staff Welfare ten Transport Departmnt an dawrna kaltlangin ni 3.5.2010 atang chuan Transport Department (JnNURM) bus (407 bus) pali chu pakhat thla khata Rs. 28,000/- in hmang a ni leh a.Heng bus pali (4) te hi an route siamah ; zingah staff an lama, tlaiah an dah haw leh thlap thin a ni.

Heng Bus pali hire na atana thlakhat senso chu Rs. 1,12,000/- lai a ni a, sum senral zualpui phuhruk nan staff atangin seasonal ticket siam a niin staff thenkhatin tha taka an lak laiin la tha duh lo a tam zawk an ni tlat mai a. Hetiang anih avang hian ticket man atanga pawisa lut hian bus pkhat hire na pawh a daih ta lo a ni. Bus hire na man atan hian a hranpaa sum hmuh a ni chuang lova, leiba inchhek khawl tam zelah chhunzawm reng theih a ni ta lo a ni.

Bus service hi chhunzawm a nih theih nan SAD hotuten Meeting vawi engemaw zat an neih tawh bakah Parliamentary Secretary SAD hovin Transport Department te nen pawh sawiho tawh a ni a. Anni Transport Department lam inhuam angin JnNURM bus te chu Khatla Assam Rifles Gate bul leh New Secretariat Complex inkar chu service chhunzawmtir tura ruahman a ni ta a, heta ruahmanna ang chuan bus fare pawh hi Transport Department lamin an khawn mai tura ngaih a ni.

Hetianga 3rd October atanga Bus service a lo tawp tak avang hian SAD atanga hmalak nghal a ni a. Ngen an nih angin Transport Department lam pawhin nimin Thawhtanni ni 3 October, 2011 tlailam atang khan JnNURM bus pahnih (2) an service chhunzawmtir ta nghal bawk a ni. State Transport Authority (STA) lamah New Secretariat Complex panna kawng hi Line Bus Service tir tura ngenna siam mek a ni a, chu chuan Old Secretariat, Treasury Square lam pawh huam tel thei tura ruahman a ni ang.

Mizoram Civil Secretariat Employees Welfare Association in harsatna an sawi hi sorkar chuan a hriatpuiin kawng hrang hrangin a sutkian dan tur a ngaihtuahin meeting pawh vawi duai lo neih a ni tawh a. Sorkar sum indaihlohna a nasat em em laia Bus 5 (panga) aia tlem lo lei nise tia an ngenna phei hi chu tun dinhmunah engti kawng maha tihhlawhtlin sak theih a ni lo a ni.

A chunga tarlan anga Bus service chhunzawm leh nghal anih laia Secretariat Welfare lamin ke a kal a lungawilohna lantir chhunzawm an tum hi sorkar chuan pawi a titakzet a, an thulh leh ngei pawh a beisei a ni.