Vawiin chhun dar 11 khan Lawngtlai DC Pu B. Lalhmingthanga, MCS, District Programme Coordinator (MGNREGA) hovin a pisa ah MGNREGS Review meeting neih a ni a. Lawngtlai district chhunga RD block 4 te Job Card endikna report sawiho a ni.

Lawngtlai District ah hian RD Block 4 - Lawngtlai, Sangau, Chawngte leh Bungtlang ‘S’ te a awm a. 2001 chhiarpuia a lan danin Household 22943 a awm a, MGNREGS hman anih atanga Job Card issue tawh hrim hrim 26363 a awm a ni. Job Card dik lo delete tawh - a neitu boral tawh leh pem tawh 2372 a awm a, tunah hian Job Card nung lai 24297 a awm. Job Card dik hlel zawnchhuah hna hi chhunzawm zel tur a ni a, final report chu 20 October, 2011 ah District Programme Coordinator (MGNREGA) hnenah thehluh a ni ang a, 25th October, 2011 ah thlirho a ni ang.

Lawngtlai District chhunga RD Block Development Officer te chuan census figure a innghah theih a nih loh dan sawifiahin Lawngtlai District chhungah hian sakhua avanga chhiarpuia la in ziak lut ve duh lo tam tak an awm a ni, an ti a. Chhiarpui neih hna in sawn te, chhungkaw 1 nisi hmundanga awm hranga Job Card hran nei tharte leh chhan hrang hrang avangin Job Card awm zat hi a danglam thin a ni, tih an sawi.

Lawngtlai district chhunga NLUP Line Department te nen MGNREGS kaihkawp dan tur sawiho nghalin District Programme Coordinator Pu B. Lalhmingthanga chuan leilaih ringawt ni lovin NREGS atang hian Terrace siam te, tui lakna siam leh hnathawh theih dang a tam a ni, a ti a. Convergence hi sorkar laipuiin a ngai pawimawh tih sawiin NLUP leh MGNREGS hi a kaldun theih nan ngaihtuahna sen a tul a ti a. Heng scheme pawimawh tak tak 2 kaikawp hian hna tha zawk leh hlawk zawk thawh a nih theih nan kawng dap turin Line department te a chah bawk.

Lawngtlai district chhunga Line department hrang hrang atanga kalkhawmten convergence atana an in ruahman dan, an beisei leh an mamawhte sawiin MGNREGS buaipuitu official lam ten guideline in a phal chin atanga an tih theih leh NLUP nen a kalkawp theih dan tur te an sawi bawk a ni.