Vawiin khan I&PR Minister Pu Lal Thanzara chuan Mizoram Cooperative Apex Bank Branch thar chu Vaivakawnah a hawng a. Heti hian Mizoram chhungah Apex Bank chuan Branch 18 a nei ta a, Aizawl khawpui chhung bikah branch 9 a nei a ni.
Pu Lal Thanzara chuan kum sawmhnih sawmthum kaltaah mi neinungte chauhin Bank Account an nei thin emaw kan ti a, tunah erawh bank account neih pawimawhzia mipuiin kan hria a, sawrkarin mipui hnena tanpuina leh hamthatna a sem te bank kal tlang veka tih a nih hnuah phei chuan neih ngei ngei ngai a lo ni ta a, bank dinhmun leh pawimawhna a sang lehzual tawh a ni, a ti. Bank hnapui ber pakhat chu loan pek a ni a, mi rinawm leh fel tam tak an awm laiin bank bum tum, loan rul tha duhlote an awm thin avangin bank a fimkhur telh telh a, midang loan la turte tan harsatna a siam phah thin, a ti a. Loan kan lak chuan rulh hi kan tih ngei ngei tur a ni tih mipuiin chiang taka kan hriat a tul, Minister chuan a ti.
Tun hnai kum sawm chhungin bank deposit a pung nasa nia sawiin Pu Lal Thanzara chuan kum 2014-15 ah Mizoram chhunga commercial bank awm zawng zawngah deposit cheng vaibelchhe 5678.99 a awm a, kum ruk chhunga a punna hi za zelah 195.07 a ni, a ti a. Kum khata State in sum a dehchhuah belhkhawm, economy that leh thatloh tehfung pawimawh bera hman thin GSDP chu kum 2015-16 chhung khan cheng 15,33,925 lakhs a ni a, Mizoram economy thanna chu hemi kum vek hian 14.53% niin India ram pum economy thanna 7.2% aiin a letin a tam zawk, a ti. Mizoram chhunga chengte kum khat chhunga an sum thawhchhuah chawhrual per capita income chu kum 2015-16 khan cheng 1,14,524 a ni a, India ram per capita income cheng 94,130 aiin nasa takin a tam zawk a ni, a ti bawk. Heng tehfung chi hrang hrang hmanga Mizoram Economy in hma a sawn nasat zia en hian ramin sawrkar hmalakna a sawtpui zia a lang chiang hle niin Health Minister Pu Lal Thanzara chuan a sawi a ni.
Hawnna inkhawm hi Mizoram Cooperative Apex Bank Chairman Pi T.Lalmuanpuii’n a kaihruai a, Chief Executive Officer Pu Lalzuahliana’n lawmthu sawina hun a hmang thung. Hawnna inkhawmah hian Cooperative Society hrang hrang hotute, Vaivakawn khawtlang hruaitute, tlawmngai pawl hrang hrang hruaitute an tel a ni.
