3093/2022-2023

Kolasib dated 17th December 2022: Vawiin khan ni 17 atanga ni 19, December chhunga Aizawl Diocese tlawh tura lo kal, Archbishop Leopoldo Girelli, Vatican Ambassador to India chuan St. Joseph the Worker Church, Kolasib a tlawh a. He hunah hian hnam lam leh duhsakna thilpek te nena lo lawm niin St. Joseph the Worker Church, Kolasib kohhran mipuite leh sawm bik thenkhatte nen inkawmhona hun an hmang a ni.

St. Joseph the Worker Church, Kolasibah hian Archbishop Leopoldo Girelli chuan thusawiin vawiin hi Pope Francis-a piancham a nih thu leh Pope Francis-a thuchhah a ngaihpawimawh zualte a tarlang a. Inpumkhatna, induhsaktawnna leh inlungrualna siamtu ni zel turin leh thil siam hrang hrang leh leilung hausakna te dim thiam a humhalh a pawimawhzia a sawi bawk a ni. Archbishop chuan thalai, rawngbawlna lama kal tura inbuatsaih mek te kawmin ngun taka ngaihtuah seng chunga thuthlukna siam țhin turin leh rawngbawlna chu biak in pawnah pawh, kawng chi hrang hranga thawh theih a nih thu a sawi a, an zir chhunzawm lehzelna turah duhsakna a hlan bawk a ni.

Archbishop Leopoldo Girelli hi Bishop Stephen Rotlanga'n a tawiawm a, St. Joseph the Worker Church a lawmna hun hi Rev. Fr. Andrew Lalbiakfela, Parish Priest in a kaihruai a, Pu John LT Sanga, Deputy Commissioner leh sawm bik ten an telpui bawk a ni.