Vawiin khan Edenthar Comprehensive High School chu Education Minister Pu Lalchhandam Ralte-in a hawng a. Hawnna inkhawmah Minister chuan HSLC leh HSSLC Board Examination chu April 2021 ah neih a ni ang a, HSLC result chu June chawlhkar hmasa berah tihchhuah a ni ang a, June chawlhkar hnihnaah HSSLC result tihchhuah tum a nih thu a sawi.

 Minister chuan Pawl I-XI te chu an pawl sawn ngawt lovin Bridge course siam tum a ni, a ti a. Covid-19 hrileng chu zirnain a tuar nasa ber tih sawiin zirlai ten sikul kal an chak tawh a, zirtirtuten naupang zirtir hna chhunzawm tul an ti tawh em em bawk a, private school-ten an tuar hle bawk a ni a ti a. Hripui avang hian zirlaiten an thiam tur ang an thiam lovang tih sawrkarin a hlau a, a theih ang angin online hmang te, TV leh a theih ang ang hmanrua hmangin zirtirna hna kalpui mek a ni, a ti a. Heng te hi nu leh pa te pawhin an fa te tan ngaihsakpui zel se a duh thu a sawi.  

   Minister chuan khawtlangin hma a sawn dawn chuan zirna a bul tan leh hei hi number 1 ah dah a ngai, a ti a. Khawtlang hruaitu te hian infiamna mual chauh thlir lovin  zirna an dah pawimawh zel hi veng hmasawnna tak tak tur a ni, tiin zirna lama thawktute thawhpui leh tanrual a pawimawh zia a tarlang.

   Khualzahawm Pu C.Lalmuanpuia MLA Aizawl North III pawhin he hunah hian thusawiin veng chhung mipui te mamawh Edenthar High School hawn a lo ni ta chu lawmawm a tih thu a sawi a. School hawn anih theih na tura Minister thahnemngaihna leh Department official-te leh khawtlang hruaitu te hmalak na ah lawmthu a sawi a. Sawrkarin kawng hrang hrangin zirna lama hma sawn nan a thawk mek a,  All India Service leh Central service a țhalaite an luh theih dan tur pawh sawrkarin kawng a zawng zel a, țhalai tum ruh leh lehkhathiam chhawm chhoh tur te pawh MYC in an thlang fel tih sawiin sawrkarin zirna lama a thawh chu ram tan kawngro su tak tur anih thu a sawi a. Edenthar H/S hawn thar chuan hnuhma tha tak a neih a beisei thu a sawi a ni.

  Edenthar Comprehensive School hawnna hi Pu C.Lalramliana Chairman Local Council-in a kaihruai a, Minister leh Bialtu MLA bakah School Education Director Pu James Lalrinchhana, Pu Lalhmachhuana SPD Samagra Shiksha bakah officer thenkhat te, khawtlang hruaitu te leh Mizoram Teacher Federation hruaitu te leh school a thawk te an tel a ni.