Aquatics Association of Mizoram Mamit District buatsaihin Ni 16th December, 2017 ( Inrinni) khan Teirei Lui, Bawngva-ah Swiming Competition nikhat awh neih a ni a. Pi Lalbiaksangi, District Bawrhsap chuan a hawng.

Intihsiakna tan hma hian hawnna inkhawm tawi neih niin Pu Lalrema President, Aquatics Association of Mizoram Mamit District chuan a kaihruai a. Pi Lalbiaksangi, District Bawrhsap chuan intihsiakna tel turte duhsakna a hlanin, dinhmun sang zawk leh tha zawk thleng thei tura hmalam hunah tumruhna nena kal zel turin a chah  bawk.

Pu H. Lianzela President, Mamit District Sport Committee, Mamit District pawhin thusawiin tuihleuh thiam infiammite chu hmasawn zel tur leh inelna sang zawk hmachhawn tura hmalam pan zel turin fuihna thu a sawi a, Bawngva Aquatics Club te chu tum lawk loh leh chhiatpalhna thleng thei tuitla chhan kawngah che hmasa leh vanduaina tawkte tanpui thei tura an rilru buatsaih turin a chah bawk a ni.

Swimming Competitionah hian Bawngva leh Nalzawl atangin tuihleuhthiam mi 25 an tel a, group hniha then niin under 16 leh Open-ah te then a ni.

Under 16 ah hian Rohmingliana, Nalzawl chu pakhatna niin Open ah hian Taimuana, Bawngva Aquatics chu pakhatna a ni. Tun tuma intihsiakna finalist-te hian nakum Mizoram pum huapa Aquatics of Mizoram-in intihsiakna a buatsaih turah Mamit District ai an awh ang.