Vawiin khan Home Minister Pu R.Lalzirliana kaihhruaina hnuaiah Co-ordination Committee on Traffic Management chu Secretariat Conference Hall-ah an thukhawm; he meeting-ah hian Finance Minister Pu Lalsawta, UD&PA Minister Pu Zodintluanga leh Transport Minister Pu John Rotluangliana te an tel bawk.

Co-ordination Committee on Traffic Management thukhawm chuan kumin Krismas leh Kumthar lo awm tur vuakveta Aizawl khawpui chhunga “No Vehicle Zone” siam chungchang sawihovin, kum hmasa lama lo tih tawh ang bawka lirthei tlan dan tur bithliah ni se tiin, nikuma ke a kal te tana Zion Street kawng chho ‘one-way’a siam erawh titawp a ni dawn a, khawi hawi zawng pawhin ke a kal phal a ni ang; festival hun chhunga kawngsira sumdawng inzuar turte chu AMC kuta dah a ni bawk. No Vehicle Zone hi December ni 22,23 leh 30-ah siam a ni ang.

UD&PA Department sum bultum in Aizawl khawpui chhunga veng hrang hrangte tan kawn inchei mawi siak buatsaih a, lawmman pakhatna atan cheng nuai khat, pahnihna atan cheng sing sarih leh pathumna atan cheng sing nga ruahman ni se tiin vawiin meeting chuan a rel bawk. Coordination Committee chuan kan hma lawka Krismas leh Kumthar lo awm turah hian Lal Isua Krista chawimawi nan mahni veng theuh fai leh thianghlim taka vawng theuh turin mipuite a chah bawk a ni.

Vawiin meeting-ah hian Aizawl khawpui chhunga traffic jam tiziaawm tura hmalakna hrang hrang te thlirho a ni bawk a: Local Council 83 zingah 54 chuan an huam chhunga lirthei neih dan ‘census’ leh garage nei leh neilo report chu an thehluh tawh thu tarlan a ni a, tun aia chak zawka veng tin endik hna kalpui tum a nih thu te sawi a ni bawk.