23 Sector Assam Rifles buatsaiha 4 Assam Rifles kaihhruai Mizo zirlai 30 tana National Integration Tour chu hlawhtling taka neih zel a ni a. Heng Mizo zirlaite chu February ni 6 (Fri), 2009 khian Aizawl lo lut leh tura beisei a ni a, Mizoram Chief Minister Pu Lal Thanhawla’n AR Ground-ah a lawm lut dawn a ni.

January ni 20, 2009-a Mizoram Governor-in a vailiam tak National Integration Tour naupangte chu New Delhi, Jaipur leh Agra te bakah an haw lamah Guwahati leh Shillong te tlawhpui an ni a. Heng khawpuia hmun lar tak tak Palika Bazaar, Connaught Place, Rajghat, Lotus Temple, Qutb Minar, India Gate, Delhi Metro, Taj Mahal, Fatehpur Sikri, Amber Fort, Hawa Mahal, Birla Mandir, Albert Hall Museum leh Lake Palace te fanpui an ni.
             
Mizo zirlai 30 te chu New Delhi-a an cham chhungin January ni 26 khan Rajpath, New Delhi-a Republic Day Parade ropui leh hmuhnawm tak enpui an ni a. India Home Minister Pu P.C. Chidambaram pawh ama chenna inah tlawhin Mizoram atanga an ken ngaihhlutna thilpek an hlan bawk. Shillong-a Assam Rifles hmunpui tlawhpui an nih hnuin Assam Rifles Director General an hmu bawk.
             
Assam Rifles chuan hetiang India hnam hrang hrang kara inpumkhatna atana Tour hlawhtling tak an buatsaih leh thei chu lawmawm an ti tak zet thu sawiin Mizo thalai state pawna la chhuak ngai loten India khawpui hrang hrang an tlawh leh India ram hmasawn nasat zia an hmuhin an rilruah pawh ram leh hnam tana theihtawp chhuah duhna rilru a piang a ni. Hei hi tour hlawhtlinna lian bera an ngaih thu an tarlang a ni.