Tukin zing dar 7 hian Lawngtlai laili Aeropagy ah Faina Hapta, 2015 hawnna inkhawm buatsaih ani a. Addl DC Pu R Lalsangluaia chuan hawngin khawpui chhung thianfaia hnatlan nghal a ni.

Pu R. Lalsangluaia chuan hriselna lungphum chu faina hi a nih avangin faina hlamchhiah tu chuan a nunna a hlamchhiah a ni. Fai inhmeh lo an awm ngai lova, mi changkangte hriat hran awlsamna ber pakhat chu an faina hi a ni, a ti. Lawngtlai khawpui chu khawpui thianghlim, chenna atan itawm a nih theih nan a chhunga cheng mek ten mawh kan phur a ni, a ti bawk.

Urban Development & Poverty Alleviation District Project Officer Pu Lallawmawma chuan Faina Hapta hman dan tur report pe in, vengtin hnatlang neih dan tur ruahmanna siamte a sawi bawk.

Tukin Faina Hapta hawnna inkhawmah hian sawrkar hnathawkte leh zirlai naupangte, an vaiin mi 600 vel an thawkchhuak a, Lawngtlai kawngpui pawimawh pali te chu insemdarhin an thianfai nghal a ni.

Faina Hapta hi October ni 9 khian DC Conference Hall ah kharna inkhawm buatsaih leh tur ani a, hetah hian Faina kawnga intihsiakna hrang hranga lawmman te sem nghal tur a ni.