India ram hmun dangte rualin tukin zing khan Champhai District-ah Swachh Bharat Cleanliness Week chu a hawnna hun UD&PA leh PHED tangkawpin an buatsaih hnu ah faina hnatlang neih chhunzawm a ni.
Faina Hapta hawnna hun CHANEM Building kawta neih hi Cleanliness Week Committee Chairman Pu C. Lalzarliana, Addl. DC Champhai hova hman a ni a. Mizoram chu India state zawng zawngah state fai ber te zing ami kan nih thu tarlangin, hmasawnna tur erawh kan la nghah hle thu Addl DC chuan a sawi a. Kan hnampa Pu Gandhi-an ram fai leh thianghlim a kan ram hi kan siam a duhthusam tihhlawhtling tum theuh turin kalkhawmte chu a sawm a. Faina hapta chhunga veng fai, zirna in leh hnathawhna hmun fai ber ni tura kan inelna te chu tun h7n chhung atan chauh nilo kumtluan leh dam chhung daih ni se a tih thu sawiin Pu C. Lalzarliana cuan mimal tinin kan nun theuhvah thianghlimna ngaihpawimawh nachang kan hriat a ngai a ni, a ti.
Pi V. Lalmuanpuii, DUDO chuan hun hi a kaihruai a. Pu K. Zohminliana, EE, PHED atangin thusawi ngaihthlak a ni bawk. He hunah hian District Office hrang hranga hotute leh Khawtlang hruaitute bakah Tlamngai pawl hrang hrang aiawhte an tel a. Swachh Bharat Mission (SBM) Champhai District-in Model School-a a puan school pathum-te an tel bawk a ni.
Vawiin ni denchhen hian khawtlang hruaituten veng tinah faina hnatlangpui an ko a. Chawhma lam khan SBM Volunteer a ruat Champhai District Bharat Scouts & Guides-te chuan kawngsira hnawmhnawk leh bal te chhafaiin an hnatlang bawk a ni. Faina Hapta hman chhung hian zirna in leh office tinten ni kha tal hnatlang nei tura beisei an ni a. Faina leh thianghlimna lama mipuite kan thanharh theih nan anganwadi, school, office, veng leh SBM Town Area (Champhai, Khawzawl, Khawhai leh Biate) zinga fai ber endikna leh thlanna neih a ni ang a. He hapta kharna hun October ni 9-a neih turah lawmman sem a ni dawn a ni.
Swachh Bharat Mission (Gramin) hnuaia PHED-in National Sanitation (Cleanliness) Campaign a kalpui chhung hian District chhunga thingtlang khaw tinah khawtlang hruaituten hnatlang an koh nan leh faina kawnga hmasawn tura electronic media kaltlanga inzirtirna leh awareness campaign hrang hranga ruahmanna an siam chu kalpui a ni dawn bawk.
