ARMED FORCES FLAG DAY, DECEMBER 7, 2020 PUALA GOVERNOR THUCHAH
Thian duhtakte u,
Kan hriat theuh angin kumtin Armed Forces Flag Day chu December ni 7 hian rampum huapin kan hmang ziah thin a. He ni pawimawh tak hi min venghim tura kan tana nun lo hlan tawh tu sipai huaisen, kan pasalthate leh tuna kan sipai ni mekte hi mipui ten kan thlawp tlat a ni tih kan lanchhuah tirna ni pawimawh tak a ni a. Kan sipai huaisen te chawimawina leh zahna kan lantirna hun a ni.
Kan sipairualte hi min venghimtu leh kan thlamuanna an ni a. Anni hi Vur hnuaiah leh khawvawt karah te , ei leh in tur mumal awm remchan lohna hmun bakah hun khirhkhan tak tak karah te pawh kan tan rinawm taka ding tlat thin an ni. Engtik lai pawhin Khawmualah te, tuipui chungah te leh boruakah te kan ram venhim hna an thawk reng a. Armed Forces Flag Day-ah hian Sipai chi thum - Army, Navy leh Air Force a thawk, kan nula leh tlangval huaisen te, kan ram ropui tak venghim tura nuna hlantute inpekna te hre thar leh turin kan in chahnawn leh a ni.
Armed Forces Flag Day pual hian khua leh tui te zawng zawng te chu tanpuina thil pek phal taka pe chhuak turin kan insawm a. Armed Forces Flag Day hi awmze nei taka hman niin kan hman chhan langsar zual te chu heng te hi a ni :-
(a) Indona hmuna sipai thi, hliamtuar leh Indona in a nghawng avanga harsatna tawk, sipai te dinhmun siamthat.
(b) Ex- Servicemen leh an chhungkua ten in leh lo an din that leh theihna tura tanpui. Tin, Ex- Servicemen leh an chhungkua te tana hamthatna ngaihtuahsak.
(c) Sipai a tang mek leh an chhungte puala hamthatna ngaihtuahsak, te a ni.
Mizoram pawh kan duai lo hle a, India ram venhimna atana Sipai chhuanawm tak te kan lo thawh chhuak thin a. Kan state chhul chhuak sipai huaisen te chu Mizoram leh India zahawmna leh ropuina tizual tute an ni.
Kan Chief Minister hlui 3(Pathum) lai chu Sipaiah an lo tang tawh tih ka hria a, an chhuanawm a, an ngaihsanawm bawk a ni. Hei hian India ram venhimna kawngah Mizo mipuite an thawhhlawk zia a ti lang chiang em em a. Ram vehimna kawngah hian Mizo mipuite hi kan duai lo hle a; zah pawh kan phu hle in ka hria a ni.
State puipa ka nihna angin kan thalaite zawng zawngte hi kan sipai huaisen leh entawntlakte nun atanga inzir tur leh an hnung rawn zui ve turin ka sawm che u a ni. Kan Mizo thalai te hian theihna sang tak in nei tih ka hria a, ram venhimna kawngah pawh sipai leh sipai hotulu ber ber ni thei turin a tam tham zawk rawn pen chhuak ula ka duh a. In theihnate ka hmuh hian sipaiah pawh rawn lut ta chiah mah ula, a sang ber ber, a hlawh tling ber ber in ni thei tih hi ka ring tlat a ni.
Kum danga kan lo tih thin ang thovin kumina Flag Day pual hian Mizoram pumah Vehbur khawn mek a ni a. Khua leh tui zawng zawng – sawrkar hnathawk te, sumdawng te leh mimal tin te pawh thinlung inhawng taka kan sipaite puala Thawhlawm lo thawh theuh turin kan insawm a.He ni pawimawh takah hian Ram leh hnam venhimna atana nunna hlantute zahna chibai buk thar lehin an kalsan tak - an chhungte tha taka lo tuamhlawm hi kan mawhphurhna a ni tih i hre thar leh ang u.
Ka thusawi tih tawp nan Kohima War Cemetary a inziak hi ka han chhiar leh the ang, “Dam taka kan vangkhawpui I kir leh hun chuan, heti hian biahthu han hrilh nang che. Hringnun dam tea I hman zui zel nan, Piallei thuahriat hnuaiah riahrun kan rem ta e”.
Jai Hind
