Thian duh takte u,

A hmasain Mizorama Indian Armed Forces chhungkua leh hemi kaihhnawih zawng zawngte Armed Forces Flag Day, 2024 pualin chibai ka buk che u a, lawmthu ka hrilh a che u.

Armed Forces Flag Day hi kum tinin December ni 7 ah India ram pumah hman thin a ni a. Mahni nun thapa ram leh hnam him nana hmasial miah lova  beitu sipai huaisen tak takte zahna chibai buk nan he ni hi urhsun takin kan hmang thin a ni.

Indian Armed Force-te hi kan ram leilung, tuipui  leh van lamte venghim tlattu an ni a. He ramin amaha inrelbawl tura dikna leh chanvo a neihte venghim turin an nunna hial pawh an hlan ngam a ni. Ram tana an inpekna hlu tak avang hian keini mipui vantlangte hi ngaihngam takin kan mut theih phah thin a ni.

He hun hi remchangah hmangin Mizoram fa hrin Armed Forces mi leh sa, Mizoram leh India ram tihmingthatute tarlan ka duh a. Tun hma lama ex-servicemen hriathlawh leh hmingtha tak takte bakah 9^th Legislative Assembly of Mizoramah hian Lt. Col. Clement Lalhmingthanga (Retired) leh  Petty Officer TBC Lalvenchhunga (Retired) te chu MLA an ni mek a ni.

He hun bawk hi remchangah hmang chhunzawmin Mizoram fa hrin India ram tana an inpekna leh hnathawh that avanga huaisen lawmman leh chawimawina ngaihhlut hlawh tak tak dawngtute chhuang taka han tarlan ka duh a ni.

Naib Subedar Jeremy Lalrinnunga, Guard Regiment, Gold Medalist, Commonwealth Games 2022 chu Vishist Seva Medal hlan a ni a.

Naik Lalhmangaihsanga Chinzah, 1^st Assam Regiment leh Major Laldingngheta, Madras Regiment-te chu ral hmaah huaisen taka an chet avangin Sena Medal (Gallantry) hlan an ni.

Sepoy H. Lalrokima, 12 Assam Regiment chu ral hmaah huaisen taka a chet avangin Mention-in-Despatch hlan a ni bawk.

An huaisen leh thiltih ropui takte avangin heng sipai huaisen leh danglam bikte hnenah hian avaiin ₹7,53,000/- pek a ni a. Heng mi hmingtha leh ngaihsan awm tak takte hi infuihthar nana hmanga Armed Forces zawm tura taksa leh rilru lama inbuatsaih turin Mizo thalaite ka chah duh che u a. Mizo thalaite theihna leh chakna ka hmuh hian Armed Forces hna zawmte pawhin hlawhtlinna changin hmingtha taka an rawn chhuah ngei ka ring tlat a ni.

Financial year hmasa leh tun financial year kal mekah Mizoram State Sawrkar chuan indona avanga sipai hliampui tuara boraltate chhungte hnenah leh ramtuileilo a chhuakte hnenah ₹12,50,000/- a hlan a ni.

He ni pawimawh takah hian Sipai thuam inbelte laka kan bat hi hre nawn leh fo ila. Thil dang zawng aiin heng ram chhantu sipai huaisente hian kawng engkima tanpuina leh tawiawm mamawh ngawih ngawih an chhungte khawhar leh mangang taka awmte an kalsan tih i hre tlang bawk ang u khai. Financial year hmasa leh tun financial year kal mekah Ex-servicemen leh an chhungte mi 30 hnenah avaiin tanpuina ₹1,58,000/- sem chhuah a ni.

Hemi a nih avang hian Armed Forces Flag Day pual hian Mizoram pumah tanpuina vehbur khawn mek a ni a. Sum leh pai khawn tlingkhawm hmang hian ex-servicemen leh an chhungte hrilselna kawnga inenkawlna mamawh leh khuarel chhiatna tuar tanpui ngaite puih an ni dawn a. Armed Forces Flag Day puala vehbur khawn hi Mizoram mipuite ngaipawimawha theuh turin ka ngen che u a. Ram chhantu sipai huaisente hre reng chung leh an kalsan tak chhungte'n inenkawlna tha an dawn ngei theih nana ngaihtuahna senga thinlung inhawng taka tanpuina pe theuh turin ka ngen che u a ni.

Ka thusawi tih tawp nan indona avanga boralte hriatreng nana Kohima War Cemetary-a inziak hi ka han tarlang nawn leh ang e, "Dam taka kan vangkhawpui i kir leh hun chuan, heti hian biahthu han hrilh nang che. Hringnun damtea i hman zui zel nan, Piallei thuahriat hnuaiah riahrun kan rem ta e”.

JAI HIND