Mizoram mipui duhtakte u, a hmasain chibai ka buk vek a che u.

Hun lawmawm tak Krismas leh Kumthar lo thleng tur pualin duhsakna inzavaiin ka hlan a che u. Lungrual taka Mizoramin Krismas kan lawm tlang leh thei tur hi lawmawm ka ti takzet a ni.

Mizoramah hian Krismas chu kan hnam ziarang leh kalphungte nena inrem takin ropui leh nung takin kan lawm thin a. Krismas vuakveta khawtlang mipui tha taka kan inphuarkhawm thin leh mahni tawng ngei maia Krismas hla kan sa thin hian hnam ziarang a tarlang tel a ni. Krismas hun chhunga induhsakna lantir nana thilpek kan inhlan thinte hian kan thilphalna a pholang a, mi baihvai leh dawmkan ngai zawkte puala kan luangchhuak thin hi a entawntlak hle a ni.

Tunhnai maiah khan Aizawl khawpui chu India ram khawpui zinga boruak thianghlim berah puan a ni a. Kan tu leh fate tana chenna tlak khawvel siam tura lungrual taka Sawrkar hmalaknate tha taka kan tawiawm thin hi he dinhmun kan thlen theih chhan leh khawpui dangte entawn ber kan nih chhan kan ti thei awm e. Boruak thianghlim kan neih theihna tura hmalakna hi tun hunpui lo thleng turah pawh vawngnung tlat turin leh, boruak tibawlhlawh lo zawnga Krismas leh Kumthar lawm za turin Mizoram mipuite ka ngen tak meuh meuh a ni.

Tunhma lam zawnga Dan leh thupek tha taka zawm chunga hunpui hman a lo ni tawh thin kha chhuanawm ka ti a, kuminah pawh hian chhunzawm leh ngei kan tum tur a ni.

Mahni chhungte kianga hunpui hmang ve thei lo tur midangte tana rawngbawlna hna thawk mek - sipai, hriselna lama thawktute leh adangte mi engemawzat an awm tih ka hria a. Heng mite hian mahni aiin midang an dah pawimawh hmasa a, Krismas awmzia leh nihna chiang takin an tarlang a, an ngaihsanawm takzet a ni.

Prime Minister kaihhruaina hnuaiah India chuan kum 2047 ah ram changkang leh intodelh 'Vikshit Bharat' nih tumin tan a la mek a. Hemi dinhmun thleng tur hian Mizoram pawhin mawhphurhna pawimawh tak a nei a. India ram hmasawnna tur ruangam duanah Mizoram a tel ve a tul a. Hemi atan hian India Sawrkar policy leh programme-te ngaihven thin tur leh a hlawhtlin theih nana phur taka tawiawm turin ka sawm che u a ni.

Kumthar lo thleng tur hian muanna, hmasawnna leh hlawhtlinna Mizo mipuiteah thlen se. Krismas leh Kumthar hun nuam tak hmang theuh turin duhsakna sang ber ka hlan a che u.

KA LAWM E.

Jai Hind