Chibai,

Mizoram Governor dinhmun ka chelh ni July ni 19, 2021 atanga kum 3 leh thla 5 chuang a liam hnuah Mizoram ka chhuahsan a lo tul ta reng mai. Mizoram ka awm chhunga Politician, Sawrkar hnathawk, NGO, Kohhran leh mipuite thlawpna tha tak ka dawn avangin thinlung takin lawmthu ka sawi a ni.

Mizoram hi ram mawi, boruak thianghlim, sik leh sa nuam leh tourism sector-a theihna nasa tak nei a ni a. Ami chengte pawh mi hawihhawm leh inthununna tha tak nei leh dan zawm thami an ni a. Mizoram khawpui ber Aizawl chu khawpui fai leh ri bengchheng tlem, a bik takin traffic dan zawm tha leh lirthei horn hmeh rik ngai lohna khawpui ti a hriatlar a nite hi India ram hmun dangte tana entawntlak tak a ni.

Mizorama ka awm chhungin MLA Election 2023, Lok Sabha Election 2024 bakah tualchhung inthlan tam tak kalpui dante ka hriatpui a. Inthlanna muanawm, felfai leh langtlang neih a ni thin leh Assembly house chhungah boruak muanawm leh entawntlak tak lantir a ni thin hi fakawm ka ti a, India ram hmun dangte pawhin entawn se ka duh khawp mai. Mizoram pawn atanga election cover tura lokal Media-te pawh Mizorama inthlanna kalpui dante chu Democracy laimu dik tak lantirna a nih thu ka hrilh bakah midangte entawn tura puangzar turin ka chah hial a ni.

Mizo thalaite zingah thiamna leh theihna nei tha tak tak an awm a, mahni awmna hmun leh nuam tihnaah awm mai lova, Mizoram pawna hna thawh tum turin ka chah duh che u a, kan hnam ziarangte midang zirtir mai bakah hnam dangte tihdan phung leh hnam ziarangte hriat tum turin ka chah a ni.

Sawrkar laipui scheme pawimawh tak tak Mizoramin a tangkai pui theih turte tha taka kalpui zel a tul a. Mipuite'n Social Security Scheme hnuaia hamthatna awmte an hman tangkai theih nana tanlak zel a tul a. Mizoram mipui bank account nei zingah Social Security Scheme-a inziaklut an tlem lutuk hi veiawm ka ti a; hemi kawngah hian theihtawp chhuah chhunzawm zel a tul a ni.

Kum sawm kal ta chhungin Mizoramin kawngpui leh inkalpawhna lamah hmasawnna hrang hrang chhinchhiah tlak tak tak a nei a. Nakum maiah Sairang thlenga rail lut thei turin kan beisei mek bawk a ni. Heng hmalakna pawimawh tak takte hian Mizoramah hmasawnna lian zawk a thlen ngei dawn a. Heng hmasawnna ruhrel pawimawh tak takte hi tangkai thei ang bera hmanga hmasawnpui tum theuh turin Mizoram mipuite ka chah che u a ni.

A tawp berah chuan India ramin PM kaihhruaiin kum 2047 ah Vikshit Bharat nih a tum a, hemi tihlawhtling tur hian Mizoram pawhin India ram hmun dangte ruala hma a sawn a ve zel a ngai a. He dinhmun thleng tur hian Sawrkar laipui scheme leh policy pawimawh tak takte theihtawp chhuaha ngaihvena tawiawm theuh turin ka chah duh che u a ni.

Kei chuan Mizorama ka chen chhunga ka hun hman dante kha ka hre reng tawh dawn a. Ka ngaihluin ka vawng reng tawh ang. Mizoramin malsawmna dawng chhunzawm zel se, kan inhmuh leh hma zawng dam takin mangtha vek u le.

Ka lawm e, Mangtha Mizoram.