Thian duhtak te u, 

Vawiin, India Republic Day vawi 76-na lawmnaa lo kalte leh Serchhip District mipui zawng zawngte in zavaiin chibai ka buk a che u. 

Kan ram tana an theihna zawng zawng hlantu pasalṭha kal hmasate lo thlir lawk - zalenna, dikna leh intluktlanna a lo awm theihna tura Danpui - Constitution pian ni a ni a. He Danpuia inziak thumal tin te hi kan ram innghahna lungphum a ni tih hre rengin, keini India khua leh tuite hian zawm leh tihfamkim i tum ṭheuh ang u. 

Serchhip District pawhin kum 26 hmel a lo hmu ta a. Hun kal tawh kan thlir letin zirna kawngah te, hriselna leh hmasawnna ruhrel din kawngah te, nasa takin hma kan sawn tih a lang a. Amaherawhchu, hmabak leh tih tur tam tak kan hmaah a la inchhawp a ni. Tanrualna leh thawhhona ṭha tel lo chuan hmasawnna tluantling a awm thei lo a. Hmalam kan panna kawngah kan District tan eng nge ka tih theih tih hi inzawt ṭheuh turin ka ngen che u a ni. 

He hun lawmawm takah hian Serchhip District chhunga sawrkar hmalakna leh ngaih pawimawh deuh deuhte tawi te-in han sawi lang ila.

Sawrkar chuan dan leh thupek kenkawh a ngai pawimawh hle a. Serchhip District-ah kum kalta chhung khan pawikhawihna thleng a tlem hle a. Kan police te pawhin, tlawmngai pawl leh mipuite ṭawiawmna avangin, remna boruak an vawng him thei a ni. Mizoram Police chawimawina sang - DGP Commendation Disk 2025 dawng turin kan District aṭangin mi 3 thlan an ni. Kan police te hian Heroin gram 258.47, Ganja kg. 3.120, rakzu litre 1061.25 leh sap zu um 12 an man a, kum 2024 chhung khan case 191 ziahluh niin heng zinga 167 te chu charge sheet an ni. Excise & Narcotics te pawhin heroin gram 1469.13 leh ganja kg 5.3584 an man a. Rakzu litre 2059.65,  sap zu bottle 85, beer 672 an man a. Case 295 an register a ni.

Serchhip Fire Station-in in kâng (house fire) vangin call vawi 2 leh ram kang vangin kohna vawi 13 an dawng a. Heng kangmei chhuahna hmunte hi hlawhtling takin an ṭhelh theih vek a ni.  

            Pawngsual case, tualthah case leh ND&PS case te Serchhip District Court-ah ngaihtuah a nih theih nan ruahmanna siam a ni a, Addl. District & Sessions Judge-II, Aizawl chuan thla tin kar khat chhung zel Circuit Court a hawng ṭhin dawn a ni.

 Loneitute leh kuthnathawktute hmakhaw ngaiin sawrkar chuan Bana Kaih - Handholding Scheme a kalpui mek a. Agriculture Marketing Board hnuaiah District Agriculture Marketing Committee, Serchhip District din fel a ni tawh a. DAMC hnuaiah hian thlai chi li (4) - Sawhthing, Hmarcha, Aieng leh Hmunphiah ah te sawrkar chuan Support Price a pe dawn a ni. Khaw tinah Society 39 kal tlangin Primary Collection Centre din a ni tawh a. Secondary Collection Centre hmun 7 ah din a ni bawk. Digital Agriculture Mission hnuaiah Serchhip District chu Drone hmanga Agricultural Land Aerial Survey neih hmasak berna leh enchhina pilot project neihna tura thlan chhuah niin, tunah hian kalpui mek a ni.

Horticulture Department chuan kuthnathawktute hnenah thingfanghma ṭiak, serthlum ṭiak, Dragon Fruit ṭiak, zikhlum chi leh tomato chi tam tham tak an sem a. Thlai tui pekna - sprinkler, tui dahna (tanky) leh green house te an siam sak bawk. Kum kalta chhung khan Serchhip District chhunga kuthnathawktuten thei leh thlai an tharchhuak hnem hle a; Mizoramah zikhlum tharchhuak tam ber niin quintal 10,661 zet an tharchhuak a ni. Mizorama Dragon Fruit Cluster zau ber chu Thenzawlah kan nei mek bawk a ni.

AH&Vety chuan National Livestock Mission hnuaiah ran vulhtute hnenah chaff-cutter leh silage drum engemawzat an pechhuak a. Kum 2022-2023 chhunga ASF hri leng avanga an vawk vulhlai suattu mi 59 te hnenah compensation 25% pek an ni. Hospital leh Dispensary-a an sum hmuh aṭangin Sawrkarah cheng nuai 2.37 an chhung lut bawk.

Fisheries chuan PMMSY hnuaiah mi 249 tanpuina an pe a. He scheme hnuaiah hian sangha dil thar, sangha note khawilenna, buh leh sangha khawi pawlhna, sangha chi siamna (hatchery) leh water testing kit an sem chhuak a.  Fish farmer te tan sangha note nuai hnih leh a chaw quintal 382.5 an pe a ni.

Sericulture chuan Central Sector Scheme Silk Samagra-2 hnuaiah beneficiary mi 63 an tuam a, rearing house sakna tur sum fai pek vek an ni.

Hriselna tel lo chuan hmasawnna hi a kal a kim thei lo tih hriain sawrkar chuan mipui hriselna atana damdawi in tihchangtlun a ngai pawimawh a. Khum 100 awm theihna tur District Hospital sak ṭan mek niin Mizorama a hmasa ber ni turin 3D Dental Laboratory dah a ni bawk. Kum kalta chhung khan nau piang 479 an awm a, vanduaithlak takin thi 4 awmin Infant Mortality Rate hi 9  a ni. Nuten hospital-ah ngei nau an hrin theih nan JSY leh JSSK scheme kalpui niin sawrkar damdawi in panna leh nau neih kaihhhnawih senso dang zawng zawng sawrkarin a awl a, JSY Scheme hnuaiah hian Rs 3,16,100 sen ral a ni. National Tobacco Control Programme hnuaiah zirna in 45 chu tobacco free ah puan an ni a. Food & Drug Administration chuan damdawi dawr engemawzat atangin dan kalha damdawi ruih theih zawrh ruk mum 4961 an man a ni.

Inkalpawhna kawng ṭha neih hi sawrkar chuan a ngai pawimawh em em a.  Kawng chei thatna maintenance fund atan sawrkar kum kal mekah Serchhip Division PWD ten cheng nuai 33.16 an dawng a, km 7.5 a thui kawng an chei ṭha a ni. Sum cheng vaibelchhe 6.37 an hmuh hmangin Serchhip, E.Lungdar, Chhingchhip, Chhiahtlang leh N.Vanlaiphaiah te kawng km 58.46 a thui siam hna an thawk mek a. Leisang Veng aṭanga Sports Complex panna kawng bakah Chhiahtlang Primary School-II leh District Jail panna kawng black top hna pawh thawh zawh a ni tawh. Heng bakah hian Chhingchhip, Tlungvel, Keiṭum leh Khawlailungah te kawng chei ṭhat hna thawh zawh tawh leh thawh mek engemawzat an nei bawk.

Serchhip Power Division chuan Thenzawlah 10MWp Grid connected SPV Power Plant chu Thenzawlah an bun mek a, 132 kV Sub-Station sak mek chu za zelah 95 an zo tawh a ni. Saubhagya Scheme hnuaiah New Serchhip huam chhung power supply siamṭhat leh tihchangtlun hna an thawk a, 100kVA chu 250kVA DT ah tihlen a ni.

Mipuiten tui thianghlim hnianghnar kan neih theih nan PHE Department chuan ṭan an la a; tui connection pek chhuah thar zat hi khawpuiah 292, thingtlangah 4525 a ni.  JJM hnuaiah project 9 - Lungkawlh, Hmunzawl,  Piler, Lungpho, Hmawngkawn, Hriangtlang, Vanchengte leh Sialhauah te thawh zawh a ni a.  Swachh Bharat Mission (G) hnuaiah mimal ek in unit 86 leh Community Sanitry Complex 2 sak zawh a ni a. Plastic Waste Management Centre pakhat siam mek a ni bawk. 

Serchhip Rural Development hnuaiah MGNREGS job card holder 16264 te tan December, 2024 thleng khan inhlawhna ni 89 siam sak an ni. N.Vanlaiphai leh Lungkawlh khuaah te PMKSY version 2.0 kalpui ṭan a ni a, Natural Resource Management aṭangin thlai chi sem niin tui dahkhawlna tanky, dil, irrigation pipeline leh a dangte siamsak an ni.  MzSRLM chak taka kalpui niin Tuihang CLF leh Tuikum CLF te chu India ramah a tiṭha ber pawl niin 3-na leh 4-na dinhmun an hauh pha a ni. Kum 2023-24 chhungin Serchhip Block chu Best Performing Block ah thlan an ni a. Champhaia buatsaih SARAS Fair-ah Best Seller Block nihna an hauh a, Aizawl SARAS Fair ah pathumna lawmman an dawng a. Regional SARAS Fair 2024 ah E.Lungdar Block chuan Best Quality leh Branded Product Award an dawng bawk.

Irrigation & Water Resources Department chuan Bungtlang leh Chawmzau-ah Ground Water Project hlawhtling takin an thawk zo a.  Thenzawl, Hmuntha, Serchhip, Khawlailung leh North Vanlaiphaiah Command Area Development Scheme an kalpui mek a. PMKSY hnuaiah Lungchhuan-ah Tuikual MI Project an kalpui bawk a ni.

Cooperation Department chuan PMJVM hlawhtling takin a kalpui mek a. Serchhip District ah Van Dhan Vikas Kendra Cluster sawmhnih pali (24) leh M-PACS pakua (9) a awm mek a ni.

Taxation Department chuan nikum January 1 atanga kumin thlengin chhiah cheng vaibelchhe 14.80 an khawn khawm tawh a. District Transport Office pawhin lirthei 779 an register a, cheng vaibelchhe 1.58 chu sawrkarah an chhunglut a ni. 

Land Records Digitization kalpui mekah Serchhip District Revenue Department chuan 100% an tihlawhtling tawh a. GIS Map-a mipui ram thun runpui ngawrh takin an kalpui. Sawrkar kum kal mekah chhiah cheng nuai 47.58 an khawn khawm tawh a. Rambuai 22 chingfelin, ram pass 281 an pe chhuak a ni.

 UD&PA hnuaiah insak ṭanpuina dawngtu chhungkaw 1525 te chuan an pawisa dawn aṭangin chenna in an nei tawh a. SBM(Urban) hnuaiah vantlang ek in 16 sak zawh tawh niin chhungkaw 1416 te hnenah ek in sak tanpuina pek a ni tawh a. Mizoram Khawpui Fai inelna hnuhnung ber 2023-ah Serchhip Town chuan lawmman pakhatna kan dawng a ni. 

DIET chuan Serchhip District huam chhunga Middle School tan Quiz competition hlawhtling takin an buatsaih a. Parakh Rashtrya Sarveksha chu December ni 4, 2024 khan Serchhip District huam chhungah neiin, Field Investigator turin mi 133 an tir chhuak a, School 105 an  tlawh an ni.

DCSO Serchhip chuan Mizoram State Special Ration Package chu January 2025 atangin a kalpui ṭan a, kg-ah cheng 20 hisapin beneficiary-te hnenah buhfai kg 8 zel pek chhuah ṭhin a ni. Ei leh bar tlachham lova furpui kan paltlang theih nan Monsoon Stock Godown 7-ah dahkhawl a ni a. Ei rawngbawlna Gas hi Serchhip khawpui chhungah home delivery a sem chhuah vek a ni tawh bawk a ni. 

Zirna hi ram hmasawnna innghahna lungphum a nih angin sawrkar chuan zirna hmasawn na ṭurin tan a la a.  Kan district chhung school 129-ah building leh hmunhma chei ṭhat hna thawh a ni a. Zirlaite tan a thlawnin uniform leh zirlaibu te, sports material te leh mid-day meal te sem chhunzawm zel a ni. Zirlai rualbanlo ten sikul an kal ve theih nan escort allowance naupang 28 hnenah pek a ni a. School 23 ah career mela neih niin, Kala Utsav (cultural competition) leh Rangotsav (handicraft competition) hlawhtling taka buatsaih a ni a. Zirtirna kawngah hma an sawn theih nan Govt. Primary School zirtirtu zawng zawng Tablet pek an ni bawk.

Serchhip District hi India ram pumah za zela teha ziak leh chhiar thiam tamna ber District kan ni a. Government Online Excellence Award - Best Online Initiative ah lawmman pakhatna kan dawng a. District te inelna Tour Itinerary Creation Competition ah pakhatna kan ni bawk a. District hmasawn chak ber te zinga mi leh kawng tam taka hmahruai mek tu kan ni. Chuvangin, sawrkar pawhin Serchhip District mipuite chungah nasa takin rinna a nghat a. Keini pawhin kan tihtur leh mawhphurhna tlanchhiatsan mai loin, keimahni-a a ṭha ber i hlan zel ang u. Ruihlo chi hrang hrang leh vaihlo kaihhnawih thil te bakah zu ngawlveina hi kan ram hmelma a ni tih hre reng ila. Heng kan thil chin ṭha lo te hi bansanin a ṭha lam kawng chauh i zawh zel ang u. 

A tawp berah chuan vawiina lo kal khawm zawng zawngte chibai ka buk nawn leh che u a. Tlawmngai pawl te, Kohhranho te, Media mi te, sawrkar hnathawk te leh mipui ten kan ram leh kan district hmasawnna atan leh muanna boruak vawnghim tura in thawhna avangin lawmthu ka sawi e.   

Hlim taka Republic Day lawm turin duhsakna ka hlan a che u. 

Ka lawm e. 

Jai Hind.