Armed Forces Flag Day hi sipai huaisen ram leh hnam tana nunna hlantate hriatrengna leh la tanglai mek mahni in-lum leh chhungte bul pawh a awm lova, ram leh hnam venhimna atana vur ram khawvawt leh thlaler ramro leh pilril tak tak ngaw dur pui pui kara awm mekte hriatrengna Ni atan rampumah kumtin December ni 7 hian hman thin a ni a. Kumin ah hian he Ni hi Chawlhni a tlak vangin vawiin khan he Ni hi ram pumah hman a ni.

Kum danga tih thin angin vawiin pawh khan Sainik Welfare & Resettlement Directorate-a officer te, sipai bang engemaw zat leh NCC tanglai mek zirlai naupangte chu Group hrang hrang ah inthenin Armed Forces Flag Day pualin thawhlawm an khawm a. Group hrang hrangte hi Minister-te Pisa ah te, Sawrkar officer pawimawh te Pisa ah te lutin indona hmuna ram leh hnam tana nunna hlantate chhungte leh sipai bang harsa zualte tanpuina, thawhlawm an khawn a ni. Anni bakah hian Bawngkawn atanga Kulikawn kawng dunga dawrkai leh mipui hnen atangin hi Ni pual hian thawhlawm an khawm bawk a ni.

Indopui pakhatna 1914 atanga 1918 khan khawvel pumpui a nghawr nghing in, Sawrkar leh mipui an chi-ai nasa hle a ni. Kha indopui rapthlak tak mai kha 11th November 1918 khan a lo tawp ta a. Hemi ni Indopui tawpna thu thang zet hi chuan Sipaite a tihlim in an thawm a tha hle mai a, an Trench khur leh Bunker atangte in hlim leh lawm takin an zuang chhuak hlawm a, a ram vel a, pangpar awm chhun “POPPY PAR” an tih mai chu an lukhum leh an kawrah te thiatin an in chibai kual a. He ni 11th November 1918, indopui pakhatna tawpna hi British-ho chuan “Armistice Day (Inremna Ni) emaw “Remembrance Day” an ti a ni. Kum tinin 11th November hian chu Poppy Par lem chu lehkha a siamin, thawhlawm khawn nan an hmang thin a. He thawhlawm tlingkhawm hi indonaa thi leh hliam tuar avanga ram tui leilo a awmte leh an thihsan, an nupui fanaute chhawmdawl nan an hmang thin a ni.

India ram a Independence hnu-ah Defence Minister-ho a Committee chuan kum 1949 atang chuan 11th November ni tawh lovin 7th December apianga he thawhlawm hi khawn ni tawh se an ti a. Chuta tang chuan he ni hi “Armed Forces Flag Day” tih hming a lo pu hlen ta a ni. He ni hi Sipai huaisen ram leh hnam tan a nunna hlan tate hriatrengna leh la tanglai mek mahni in-lum leh chhungte bul pawh a awm lova, ram leh hnam venhimna atana Vur ram khawvawt leh thlaler ramro leh pilril tak tak ngawdur pui pui kara awm mekte kan hriatrengna ni leh chibai kan bukna ni pah fawmin, hemi ni hian kan sawi tak indona hmuna ram leh hnam tana nunna hian tate chhungte leh Sipai bang harsa zualte tanpuina, thawhlawm (donation) khawn a ni thin, chuvangin kumtin “Armed Forces Flag Day” hi 7th December hian India rampumah urhsun takin tun thlengin hman a lo ni ta a ni.