Kum khat dana neih thin Mizoram Excise & Narcotics Service Association (MENSA) General Conference vawi 14-na, ni 2 awha Excise Commissionerate Conference Hall-a hman mek chu vawiin khan Excise Minister Pu R.Lalzirliana’n a hmanpui.
Minister Pu R.Lalzirliana chuan thusawiin thawktu indaihlo tak chunga Excise Department ten an mawhphurhna te hlenchhuak tura an thawhrimna ah lawmthu a hrilh a. Thawktu tam ringawtin awmzia a nei lo tiin Minister chuan huaisenna, thawhrimna leh dikna nena thawh chuan danglamna a thlen thei a ni, a ti. MENSA member te chu ram hmel lanna an nih thu sawiin Sorkar hmalakna tha taka bawhzui zel turin mipui rintlaka awm thin tur leh a tul anga insiamtha turin a chah bawk. MLPC Act hman turah an hna leh mawhphurhna te a pun belh tur thu sawiin Minister chuan Sorkar hmalakna tihlawhtling tura thahnemngai taka thawka khawtlang hruaitute leh mipui thawhpui thiam turin a chah bawk. Kum 17 chhung Total Prohibition hman laia zu lei tur a awm reng te, zu chhia in avanga mi tam takin an tuar phah dan te Sorkar chuan hriain MLPC Act chu a duang a, zu thlah zalenna tur nilovin khuahkhirhna hnuaia enkawlna tur tha zawk a nih dan te a sawifiah bawk. Kum tam tak Krismas leh Kumthar laia sum tam tak senga halpuah kan hal thin chuan mi tam tak tan harsatna a thlen thin avangin Sorkar chuan a khap a, hlawhtling taka kalpui a ni thei chuan tumna a awm chuan hlenchhuah dan a awm zel a ni tih a tarlang a, kan zavai that tlanna tura Sorkar hmalakna te Mizo mipui ten tha taka an zawm thin chuan Mizoram a chawimawiin thuawih tak kan nih zia a tarlang bawk a ni, a ti.
Vawiin MENSA General Conference ni 2-na hi President Pu T.Lalramzauva’n a kaihruai a, kum 2 kalta chhunga an member boral mi 12 te sunna hun an hmang bawk. MENSA ah hian member 452 an awm mek a, General Conference hmang hian Mizoram district hrang hrang atangin member te an kal tha hle a ni.
Conference ah hian kum 2015-2016 hruaitu atan heng mi te hi an thlang :-
President : Pu T.Lalramzauva
Vice President : Pu Peter Zohmingthanga
General Secretary : Pu C.Thangchuanga
Asst. Secretary : Pu Lalrinnunga
Treasurer : Pi Lalhlunchhungi
Finance Secretary : Pu Lalkunga
