Mamit District Bawrhsap Pi Lalbiaksangi hmalakna avanga District Administration, 4th IR leh 181 Bn BSF te tangkawp-a November 2016 a sipai lak runpui neih huna intlar tumte tana buatsaih Army Special Pre-Recruitment Training tur mi 29 te chu vawiin khan 4th IR Bn Badminton Hall-ah lawmluhna neih an ni.

He mi pual inkhawm tawi hi Pu Lalthiamsanga Sailo, Commandant 4th IR Bn in a kaihruai a, Pi Lalbiaksangi, District Bawrhsap chuan thu sawiin Mamit District chhunga Sipaia intlar tumte fuihna thu sawiin hetianga inbuatsaihna hi district dangah a awm loh thu a sawi a, he training a tel te chu an vanneih takzet thu sawiin hei hi Mizoram Governor in Mamit a rawn tlawh tum a, amah biakrawnna leh ngenna a vanga he special training hi buatsaih a ni a ti, Mizo tlangvalte chu a tam thei ang ber sipaia luh tum turin leh chumi kalkawng atana inbuatsaihna special training a tel te chu tumruhna, taimakna, chhelna leh mahni inthununna nei turin a chah a ni.

Pu C. Lalnunmawia SP, Mamit pawhin thu sawiin District Bawrhsap hova thawhhona tha tak hnuaiah he special training buatsaih a ni chu lawmawm a tih thu sawiin thawhrimna leh hrehawm tawrhna lo chuan hlawhtlinna kawng a in hawng thei lo a ni tih hre reng a, sipaia tling ngei tura training bei turin a chah bawk a ni.

Pu H. Lianzela Addl D.C Mamit chuan Sipai-a intlar tumte chu lehkha pawimawh hrang hrang leh online hmanga email ID siam a ngaih avangin hengte hi D.C Office ah engtik lai pawhin buaipui sak an in huam thu sawiin, Mamit District atanga sipai-a intlar tumte chu an tlin ngei theihna tura Special training an tan buatsaih a ni chu, an vanneih zia in hria a, tha taka training bei turin a chah bawk a ni.

He Special training bei tur hian mi 32 in hming pe lutin hetah hian mi 29 an in lan a, training hian July 23 thleng a awh anga, he training zawh hian 181 Bn BSF te chuan thil tul pawimawh hrang hrang zirtirna an nei leh ang.