Army recruiting Office (ARO) Aizawl chuan Mizo thalai sipaia tang tura May thla 2013, Rajiv Gandhi Stadiuma thlan fel tawh mi 209 te chu sipaia tang turin September ni 30, 2013 khian Vanapa hallah vailiam turin Chief Minister Pu Lal Thanhawla chu an sawm.

ARO hotu Col DS Phansalkar chuan heng thalai 209 te bakah hian Aizawl atanga Mizo thalai pakhat chu sipai officer ni turin Officers Training Academy, Chennaiah training nei tura Service Selection Board a paltlang thu sawilang bawkin, Aizawl Mizo nula pahnih Military Nursing Serviceah Officer ni turin Septemner ni 5, 2013 khian Indian Army an zawm tur thu a sawi bawk a ni. Hengte bakah hian 11 Aug 2013 khan Mizo thalai 62 in National Defence Academy a lut turin UPSC Exam an hmachhawn bawk a ni a ti.

Col. Phansalkar chuan hetianga Mizo thalaite hlawhtlinna hi Chief Minister Pu Lal Thanhawla hmathlir neih that avang leh nasa taka tan laa thalaite a fuihna rah a nih thu a sawilang a. Chief Minister hmalakna avang hian amah ngei pawh cho phurin coachingte, counsellingte, psychological leh medical tests te neihpuiin, Mizo thalai a tam thei ang ber Indian Army Officer leh sipaiah an luh hi a duhthawhpui hle tih a tarlang bawk a ni.