Vawiin khan Army Recruiting Office (ARO), Zemabawk chuan Aizawl chhunga college hrang hrang leh school thlanbika zirtirtu Nodal Officer-a ruat te chu I & PR Conference Hall-ah ko khawmin Army-ah Pawl 12 leh Graduate pass chin te tan officer a luh theihna ‘entry scheme’ hrang hrang hrilhriatna hun an hmang.

Col. D. S. Phansalkar, Director, ARO chuan inhrilhhriatna hun hmangin Nodal officer ten Mizo thalai a tam thei ang ber Army-a officer-a an luh theih nan an mawhphurhna leh hemi kawnga hma an lak theih dan te zau takin a tarlang a, hemi lamah hian ARO chuan a tul na ah puih zel a in huam thu a sawi bawk. Col. Phansalkar chuan tunah hian Army-a Mizo Officer 26 vel an awm thu tarlangin tunhnaiah Mizo officer-a lut an tlem a, Army chu carrer option-a zirlai ten an nei theih nan inhrilhhriatna hun te nei a, zirlai naupang te Army zawm tura fuih a tul thu te a sawi tel a ni.

Mizo hnam nunphunga bet; dikna, taimakna, tlawmngaihna, huaisenna, tuarchhelna leh infiamna lamah an theihna te, hmeichhia te zahna nate, Pathian tihna leh Mizo nun zemawi dangte chu Army-in officer-a quality a zawn te chu a ni a, hemi lamah chuan Mizo thalai te chu an duai lova, an ngaihtuah awm lo a, amaherawh chu sap tawng leh general awareness lama harsatna an neih thin avangin written exam an pal tling lo fo thin a. Hetah tak hian Nodal Officer te chu an pawimawh a, written exam an paltlang thei nan sap tawng leh general awareness-ah te a bika zirtirna an buatsaih a tul dawn a, hma la turin a chah a ni.

Tuhnaia NCC ‘C’ Certificate nei te tan Special Entry for Short Service Commission hawn chu Mizo thalai 11 in an dil mek a. Diltu 11 ten Service Selection Board interview an paltlang theih nan pre-psychological testing chu Mizoram University-ah leh pre-medical checkup chu Aizawl Civil Hospital leh Army Field Hospital-ah te ARO hmalakna in neih tum a nih thu Col. Phansalkar chuan a sawi a. Hemi hnu hian Eastern Army Command-a army officer ten heng thalai 11 te hi SSB chungchang zau taka hrialhhriatna hun pawh buatsaih an tum thu a sawi bawk.