Vawiin tlai dar 4 khan ni 4 chhung neih tak Hriselna Kutpui India ram damdawi thiamna pholanna leh tihlarna, AROGYA MELA Mizorama vawi 4 na neih tak chu khar a ni. Mela neih chhung hian AYUSH Clinic leh Stall te, sorkar department thenkhat te leh Health Programme hnuaia Programme hrang hrang te tarlangin pho chhuah a ni a. Tual chhuak damdawi, ramhmul leh thei leh thlai atanga siamchhuah te leh India ram leh pawn lama thing leh thlai leh ram hmul hmanga siam chhuah damdawi chi hrang hrang te pholan a ni bawk.

A kharna inkhawm hi Dr.C.Lallunghnema Dy. Director, AYUSH chuan a hmanpuia a Stall hawngtute leh a tel te hnenah Certificate a sem nghal a ni. Pu Lunghnema chuan AROGYA Mela hlawhtlinna tura rim taka thawkte chungah lawmthu sawiin, State Sorkar hruaitute chungah AYUSH hmasawnna tura an hmalakna avanga lawmthu a sawi bawk.

He MELA hi mi sang nga chuang fe in an tlawh a, dam lo leh inentir mi 1000 chuang an awm bawk. AYUSH Directorate thuneitute chuan MELA hlawhtling tak an nei thei chu lawmawm an tih thu leh tun financial year chhung hian tun aia ropui leh changtlung zawk hian neih leh an tum thu an sawi. AYUSH hmanga thiamna hi Sorkar laipui zawk chuan chak zawka chawikana tihlar a tum a, tunhmaa Health Ministry hnuaia department pakhat anga awm thin kha tun sorkar hian Ministry hranin a siam a, State tin te chu AYUSH Department nei vek turin a hriattir tawh nghe nghe a ni. A hawnna inkhawmah khan Chief Minister Pu Lal Thanhawla pawhin AYUSH Directorate tihchangtlun chu sorkar-in a khawih mek a ni tih thu a lo sawi tawh a ni.