Lungleia cham mek Parliamentary Secretary Pu Joseph Lalhimpuia chuan tukin zing khan a bial chhunga mi Chanmari Hall sak mek chu a hmunah a tlawh.

Lunglei veng lian ber Chanmari hian thangkhat lian chhung Hall nei ve tur hian an lo bei ve tawh thin a, bialtu MLA leh Chief Minister hmalak puinain he Hall sak hna hi kumin ni 15th January khan thawk tanin 15th June 2016-a zawh hman tura beisei a ni. Lunglei khawpui chhunga veng khat Hall lian ber tur hi Rs.4,60,09,244/- senga sak tur niin first installment Rs.106.6 lakhs hmangin contractor-in hna a thawk chho mek a, khawtlang hruaitute chuan tun thlenga a hna thawh danah lungawi thlak an tih thu Parliamentary Secretary hi an lo hrilh a ni.

Chanmari Hall hi a hnuaiah motor kaltlang thei turin kawngpui a awm a, a chhawng chungah hian Basketball court leh Badminton Court pathum awm tura ruahman a ni a, a kual vekin gallery siam a ni ang.

Parliamentary Secretary-in Chanmari Hall sak mek a ennaah hian Pu Maipa, EE, PWD Building Division Lunglei; Pu R.L.Zidinga, Dy. Director, UD&PA; H.Zosangliana, DEO, Lunglei leh officer engemaw zatin an tawiawm a; Chanmari YMA hruaitu, VC te leh Hall Committee ten an enpui bawk a ni.