Sawrkar Laipui ruahmanna hnuaia India khua leh tui zawng zawng tana hamthatna scheme 3 - Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) te chu nimin tlai dar 6:30 khan India Prime Minister Pu Narendra Modi’n Kolkata ah a hawn ruala ram puma tih angin Finance Minister Pu Lalsawta chuan Mizoram tan Aijal Club ah a hawng.
Khuallian Pu Lalsawta chuan hawnna thu sawiin insurance chu tih duh thin mah ila, dinhmunin a zir loh avangin mi tam takin an ti thei thin lo a ni, a ti. Vawiin tlaia Prime Minister-in a hawn tak scheme te chu sum tlemte chauh sen a ngaih vangin thingtlang mi rethei tan kawng a hawng dawn a, a ropuiin hmasawnna rahbi pawimawh tak a ni, a ti. Scheme siam chhan mi rethei zawng zawng ten an chhawr tangkai ngei theih nan uar taka mipui hriata puanzar a pawimawh thu a tarlang bawk.
Khualzahawm Tourism Minister Pu John Rotluangliana chuan scheme hawn ni chu India khua leh tui te tan ni ropui, Mizoram mipui te tan ni chhinchhiahtlak a nih thu a sawi a. Mihring thlakhlelh ber chu innghahna (security) a ni tiin scheme hawn thar 3 hmang chuan Bank kal tlangin mitinin kan nei thei dawn a ni, a ti. Mitinin Bank Account neih a pawimawhzia leh tangkaina te mipui hnena uar taka zirtir zel turin Bank hotu rual kalkhawm te chu a sawm bawk.
He scheme hian eng Bank ah pawh Savings Bank Account neitu te hnenah sum tlemte chawiin kum khat chhung insurance leh pension a huam ang a. Kum khata Rs 12 /- chauh premium chawiin PMSBY hnuaiah accident-a boral te hnenah Rs 2,00,000 /- leh accident avanga pian phunga rualbanlo te hnenah Rs 1,00,000 /- te a keng tel a. PMJJBY scheme hian kum khata Rs 330 /- premium chawiin eng vang pawha thihna Life Insurance Rs 2,00,000 /- a keng a ni. APY scheme hi hnathawhna hmuna pension scheme nei lo te tan kum upat dana zir leh thla tina an dah zat azirin kum 60 an tlin hnua thla tina pension Rs 1,000 /- atanga Rs 5,000 /- thleng an dawn theihna tur a ni. Heng Scheme te hi State Bank of India Branch hrang hrangah leh Bank dang (Core Banking system neite) te hnen atang pawhin Savings Account neite tan application form dahkhatin a thehluh theih reng a ni.
Nimin tlaia mipui hamthatna scheme thar 3 hawnna ah hian Minister pahnihte bakah Finance Commissioner Pi L.N.Tochhong, Finance Secretary Pu F.Vanlalruata leh Mizorama bank hrang hrang hotute an tel a, Khuallian hian Insurance zawmtu mi 10 hnenah Insurance Certificate a hlan nghal bawk a ni.
