Art &Culture Minister Pu P.C. Zoram Sangliana chuan vawiin khan Zonet Studio, Zarkawtah Solfa zirna bu, Pu T. Zorampela buatsaih ‘Solfa Huan’ a tlangzarh.

Minister chuan lehkhabu rotling, Zofate ngah loh tak, mahni chauh pawha solfa thiam taka zir theihna tur buatsaihtu Pu T. Zorampela taihmakna leh thawhrimna fakawm a tih thu a sawi a. Zai ngaina leh ngaithla tam hnam, zai dan kalhmang leh Music awmzia leh nihphung hre tlem viau lawisi te tan hian a bul thuma zai dan kalhmang leh Music nihzia hriat theihna tur Staff Notation leh Tonic Solfa zirna Bu chu a tangkai hle dawn a ni, a ti a.Thangthar lo la awm zel tur te tan leh tuna zaimi kan neih mekte tan lehkhabu tangkai tak a nih a beisei thu a sawi a ni.

Lehkhabu tlangzarh inkhawm hi Pu RK Lianzuala’n  a kaihruai a, Pu Lalrammawia’n lehkhabu thlirlawkna (preview) hun a hmang a ni.