2665/2026-2027

Kolasib, 14th October, 2026: Vawiin chawhma dar 10:00 khan Taitesena Hall, Venglai, Kolasib-ah Art & Culture Department hnuaia wing hrang hrang tangkawp—Tribal Research Institute, Mizoram State Archives, Mizoram State Museum leh Mizoram Publication Board te buatsaihin 'Museum, Record Exhibition cum Booksale' hawn a ni. He hun hi Kolasib Bawrhsap Pu H. Dolianbuaia chuan khuallian niin a hawng a, Pu C. Lalruatfela, Curator, Mizoram State Museum chuan inkhawm hi a kaihruai a ni.

Khuallian Pu H. Dolianbuaia chuan thu sawiin, Art & Culture Department in hetiang hun tha Kolasib-a an rawn buatsaih chu lawmawm a tih thu a sawi a. Art & Culture Department mawhphurhna pawimawh zia sawiin, Mizo thil hluite pho chhuah bakah Publication Board kaltlangin mipuiten tangkaina nasa tak an hmu a ni, a ti. A zirlai huna Library a lo hman tangkai thin zia sawichhuakin, "Retheihna chu lehkha zir loh nan emaw hmasawn loh nan emaw chhuanlamah hman tur a ni lo. Lehkhabu chhiar tur Library-ah a awm reng a ni," a ti.

Vawiina Art & Culture Department-in exhibition an rawn buatsaih chu, zirlaiten lehkhabu atanga an zir thin, a taka an hmuh theihna tur a nih avangin Mizo thil hlui hriat nan a pawimawh hle a ni, a ti a. Hmanlai Mizo incheina te leh an ina awm thin bungruate chu a tak ngeia an hmuh avangin an ngaihtuah thiam tawh dawn a ni, a ti. Zirlaite chu tum mumal tak nei tur leh, kuhva, meizial leh ruihtheihthil dangte laka fihlim turin a chah a. Hlawhtling ngei tura tumruhna nei turin a fuih bawk.

He hunah hian Pu RK Lalawmpuia, Senior Research Officer, Tribal Research Institute hnen atangin report ngaihthlak a ni a. Report-a a tarlan danin, he exhibition hi Art & Culture Department hnuaia wing pali tangkawpin an buatsaih a ni a, an thil pho chhuahte thenkhatte chu a hnuaiah hian tarlan an ni:

Mizoram State Museum: Mizo ziarang tarlangtu Museum object chi hrang hrang 135 pho chhuah a ni a, foreign currency leh lunghlu mawi tak takte pho chhuah tel a ni bawk.

Tribal Research Institute: Mizo culture zirchianna bu leh lehkhabu hlui, hlu tak tak an chhut nawnte chu hlawkna um lovin mipuite lei theihin copy 49 vel an chhawpchhuak a ni.

Mizoram State Archive: lehkhabu vang bu 45 leh document pawimawh tihlen (enlarge) 30 an tar chhuak a. Heng bakah hian Pu Buanga Log Book te, Mizo chanchinbu 'Laisuih' te leh chanchinbu chhuak hmasa thenkhatte mipui chhiar leh en theihin pho chhuah a ni bawk.

Mizoram Publication Board: Lehkhabu tha tak tak chi 70 lai chu 20% discount-a zawrh chhuah a ni a, hengte hi zirlai tan lehkhabu tangkai tak tak an ni.

He Museum, Archive & records, exhibition & book sale hi Art & Culture Department-in kum tina a buatsaih thin (annual working program) pawimawh tak a ni a. District hrang hrangah neih chhawk thin niin, nikum khan Khawzawl-ah hlawhtling taka hman a lo ni tawh a ni.

Mipuite leh zirlaiten an hlawkpui theih nan en man awm lova buatsaih a ni.

Hawnna inkhawm hi Paul Lalringzuala, Archivist, Mizoram State Archives chuan lawmthu sawiin a khar a. Hemi hnu hian Khuallian leh official dangte hian Exhibition stall hrang hrangte hi an tlawh kual nghal a ni. He exhibition hi naktuk, October ni 15, 2026 thleng hian Taitesena Hall-ah neih chhunzawm a ni ang.