2663/2026-2027

Aizawl, 14^th October 2026 ; Union Minister of State for Education and Development of North Eastern Region Dr. Sukanta Majumdar chuan vawiin khan PM-DeVINE scheme kaltlanga kawng laih mek Aizawl Bypass on Western Side a tlawh.

Pu Majumdar hian Sihhmuia base camp tlawh hmasain PWD officialte leh kawng siamtu contractorte nen an inkawm a, kawng laih hna hi January 2028 a thawh zawh tur a nih thu an lo hrilh a, minister hian hun tiam chhunga zo ngei tura hrilhin, hnathawktu (labour) leh khawl tam zawk dah belh turin a hriattir nghal a ni. Aizawl khawpui zauh belh tumna atana ruahmanna te tihlawhtlin leh khawpui chhung traffic tawt lutuk tihzangkhaina kawngah he project hian pawimawhna bik a neih avangin, Aizawl khawpui atanga Bypass Road thlenga kal theihna (approach road) dang siam belh chu State Fund atanga tih a ngaih tur thu a sawi bawk.

PWD hotute chuan bypass road laih mek hian Lengpui Airport, Sairang Railway Station, Industrial Growth Centre Luangmual, Zoram Medical College & Hospital leh Mizoram chhim lam tan inkalpawhna tha leh awlsam a thlen dawn tih sawiin, Mizorama khualzinte tlawh hlawh ber pakhat Reiek khaw kalkawng a pawh dawn avangin tourism lamah hmasawnna nasa zawk a thlen theih dawn thu leh kawngpui tha chuan kuthnathawktute thar chhuah phurhna a ti ziaawm ang a, he kawngpui chhehvela chengte tan pawh eizawnna kawngah hmasawnna a thlen thei dawn tih an sawi a ni.

PWD hotute chuan Project kallai mekah khualzin hip tura kawngpui leh a chhehvel cheimawina tur a tel loh avangin PM-DeVINE Scheme thar lo awm turah project thar siama telh an dil a, hei hi tihhlawhtlin a nih chuan kawngpui mawina bakah lirthei khaltute leh khualzinte himna kawngah nasa takin kawngro a su dawn tih an sawi bawk a ni.

Construction of Aizawl Bypass on Western Side under PM-DeVINE Scheme atan hian February ni 10, 2024 khan cheng vaibelchhe 500 sanction a ni a, contractor atan RG Buildwell Engineers Pvt. Ltd. thlan niin, January ni 16, 2026 khan hna thawk tan tura hriattirna chhuah a ni. Kawng hi kilometer 45 laih tur a ni a, Sairang Sihhmui atanga intanin Muallungthuah a chhuak ang, tun dinhmunah 33.61% laih tawh a ni a, January ni 16, 2028 a lai tlang fel tura tih an ni.