2662/2026-2027 

Dated Khawzawl, the 14th October, 2026 : Vawiin khan Rabung Fishery Society chuan ICAR-Central Institute of Freshwater Aquaculture (CIFA), Bhubaneswar, Odisha kaltlangin a hmasa ber atan Portable Carp Hatchery an dawng a. Society kuta Hatchery hlanna hi Khawzawl District Deputy Commissioner (DC), Pu K. Vanlalthiana chuan a hmanpui.

Khawzawl DC Pu K. Vanlalthiana chuan sangha vulh leh thar chhuah kawnga hmasawn a tul thu sawiin, Portable Hatchery thar chuan Society bakah Khawzawl District-a sangha vulhtute mamawh nasa taka a phuhruk a beisei thu a sawi a. Khawzawl District-in sangha vulh lama hmasawnna hmel an hmuh mek chu DFDO leh mipuite thawh hona that vang a nih thu a sawi bawk. DC chuan Portable Hatchery thar chu sangha chi tih punna leh enkawl zangkhai zawkna tur a nih thu te, mamawhna hmuna sawn kual zung zung theih a nih avanga sangha thar chhuah kawngah leh khawtual ei leh bar zawnna kawnga hmasawnna thlentu a nih tur thute a sawi.

Khawl thar hlanna neih a nih rual hian Pi Zomuansangi, District Fisheries Development Officer (DFDO), Khawzawl leh technical mi thiamte chuan Society member-te chu a hman dan leh sawngbawl dan tur an zirtir nghal a ni.