Vawiin chawhma dar 11:00 am khan Archives Hall, Babutlang-ah Art & Culture Minister Pu R. Romawia'n Digital Archives leh ni thum awh tur 'Workshop on Archives' a hawng. Digital Archive leh workshop hi Art and Culture Department hmalakna niin, kan ram leh hnam rohlu thuziak te tha taka enkawl a nih zel theihna atan leh, hemi lama Dan kan neihte - Mizoram Public Records Act 2011 leh, Mizoram Public Records Rules 2014, bawhzui na atan he hun hi buatsaih a ni.
Pu R. Romawia chuan Art and Culture Department hmalakna pawimawh tak chu fakin, thil lo thleng tawh kan chanchin ziak na document te hi rohlu an ni a, he kan ram rohlu hi kan humhalh tlat tur ani a ti. Minister chuan Digital Archive kan nei hi hmasawnna ropui tak ani tiin, lehkha a thil ziah te chu kum tam a liam chuan ti chhe theitu an tam avangin khawvel thiamna sang zel hmang tangkaia digitization lampang kan hawi hi thil dik ani a ti. Minster chuan mumal leh fel zawka Mizoramin record pawimawh a neihte vawnthat theihna tur Dan-Mizoram Public Records Act 2011 leh Mizoram Public Records Rules 2014 te uluk taka duan anih thu a sawi a. Thil hlui vawn leh humhalh a hautak em avang leh fimkhur a ngaih em avangin Minister chuan department officials kal khawm te chu written documents leh digital archive ngai pawimawh taka vawng tha zel turin a chah bawk.
Digital Archives hawnna programme hi Pi Thanhliri Pachuau, Secretary, Art & Culture in kaihruaiin, Pu F. Lalthanmawia, Archivist, Mizoram State Archives in report kimchang tak a pe a. Pu R. Hmingthanzuala, Director, Art & Culture Department chuan lawmthu sawiin hun hnung a khar a ni. Ni thum awh tur ‘Workshop on Archives’ hi Department thlanchhuah 25 aiawhte tel tura beisei an ni bawk.
