Dr. Harsh Vardhan, Union Minister for Science & Technology and Earth Sciences lehlang tura Aizawl rawn tlawhin vawiin chawhma khan Mizoram University, Tanhril ah Mizoram Bioresources Development Centre(MBRDC) hmalakna bul tanin lungphum a phum a. Department of Biotechnology pawh tlawhin Advanced State Level Biotech Hub a hawng nghal a. Hemi hnu hian MZU Guests' House Auditorium ah Union Cabinet Minister pualin official programme buatsaih a ni.

Dr. Harsh Vardhan chuan Mizoram an rawn chuangkai thei chu lawmawm a tih thu leh Mizoram chu hmun mawi leh nuam a ni a ti a. A rawn kal chhan Biotechnology(BT) a hmalakna chu India sawrkarin Information Technology(IT) leh hmalakna pawimawh dang ang thovin a ngai pawimawh tih a tarlang a. A hmunhma, sik leh sa leh ramhmul hauhsakna thlengin a zir avangin, Biotechnology chu Mizoram tana hmalakna remchang tak a nih tur thu a sawi a. Mizoram Bioresources Development Centre(MBRDC) hmuhma central sawrkar inhuamna aia zim a tih thu sawiin MZU in ram zau zawk a pelh belh phawt chuan tuna ruahmanna neih sa aia lian deuh zawka kalpui a theih ang tih sawiin MBDC hmalakna atan hian sum a harsa lovang a ti. Prime Minister Narendra Modi-a'n hmarchhak bial hmasawnna a dah pawimawh thu sawiin kawngkhat a hmasawnna chiah nilovin kawng awm thei zawng zawngah hmarchhakchhak tih hmasawn a nih theih dan kawng zawng turin central Minister te a rawn tir thin tih Dr. Harsh Vardhan chuan a sawi a. Sawrkar laipui chuan lehkha zirsang emaw thiamna nei sang lo pawh ni se, mihring tumruh,hmathlirthui, hisap neitha leh tihtakmeuhva dinchhuah tuma rawn penchhuak, 'innovators' leh 'idea neitha' an tih te chu sum emaw kawng dang a puih an ngaih pawhin a pui ngei ngei dawn a ti a. "Sawrkar leh MZU te paw'n ngaihtuahna tha zawk leh hmalakna sawt zawk tur in duang chhuak a nih phawt chuan proposal siamin rawn thehlut ula", ngaihven a hlawh ngei ngei ang a ti a. Mizoram in kawng tam takah hma a sawn tih tarlangin, Health sector ah erawh chuan ramhruaitu a nih ang leh Medical Doctor a lo nih tawhna atanga a vei em em chu, Cancer ah mihring tam lam chawhruala Mizoram a sangfal lutuk chu sawrkar, khawtlang leh mipui anga inenfiahtlan leh tanrual ngai lai a ni a ti a. Mipui nuai sawm pahnih emaw lekah cancer a tam lutuk hi a hlauhthawn awm a, ngaihven a tul a ti.

Pu Lalsawta, State Planning Minister leh Science & Technology Department enkawltu pawhin MBDC avanga sawrkar beiseina a san thu a sawi a. Mizoram hmasawnna lamtluanga rahbi pakhat a ni tih sawiin MBRDC chuan Mizoram chhunga ramhmul tangkai tak tak te a hmuchhuaha, kuthnathawktu te tan pawh thiamna pekbelhtu a nih a beisei thu a sawi a. NLUP hmalakna hnuaiah ramngaw leh nungcha humhalh in rahtha a chhuah mek a a ti a. Ramhmul hausakna zirchianna chuan NEDP hmalakna ah nghawng tha a neia a rin thu a sawi a. NEDP hmalakna hnuaia kuthnathawktute thawhchhuah tur zat pawh a belhchhah a, a tihpun sawt theih ngei a rinawm a ti a. Mizoram sawrkar chuan ramhmul hausakna zirchhuahna leh ramhmul damdawi siamchhuah kawnga hmalakna te chu a ngaihven zel dawn bakah a thlawp zel ang a ti a. Advanced State Level Biotech Hub pawh mihring hriselna atana thiamna pawimawh tak tak hmuhchhuahna hmun atan a tangkai tur thu a tarlang a ni.

Prof. Lianzela, Acting Vice Chancellor, MZU leh a thawhpui ten Union Cabinet Minister hi MBRDC lungphum phumnaah leh Advanced State Level Biotech Hub hawnna ah te an lo dawngsawng a. Dr.C.Vanramsanga, Secretary, Planning, Science & Technology, etc.. chuan Union Cabinet Minister puala Official Programme MZU Guests' House Auditorium chhunga neih hi in a kaihruai thunga. He hunah hian Parliamentary Secretary Pu K.S.Thanga leh sawrkar mi pawimawh te pawh an tel a. Report-a tarlan dan chuan MBRDC sakna hmun atan hian MZU in ram 2 acre a zau a pe a, MBRDC sak nan hian Cheng vaibelchhe 14.65 ruahman niin kum 5 chhunga sak zawh a ni ang.