Vawiin khan Champhai DC Conference Hall, Keifangtlangah ODF lawmna tur thlirlawkna neiin Bawrhsap Pu Vanlalngaihsaka, IAS, kaihhruaina hnuai ah Champhai a Sawrkar Department Head of Office leh NGO aiawh sawmbik te an thukhawm.

Mizoram a Open Defecation Free District hmasa ber nihna lawmna tur ngaituahna thutkhawmah hian thu pawimawh hrang hrang sawiho niin, tan hun a tana ruat chawhma Dar 10:00 AM chu mitin ten ngaipawimawhin a hun taka thlen kim vek tura rel a ni. Motor keng te chuan DC Office kawtah chhukin ke a Keifangtlang hall pan tur a ni a, Motor chu Driver ten DC Complex field (Keifangtlang field) a dah tur a rel ani. Driver neilo te chu DC Office kawtah driver ruat ten lo nghakin field lamah an lo dah thla ang a, function chhunga mahni thil mamawh tur damdawi leh mamawh dang chu mahni a ken vek tura rel a ni bawk.

Village Council Member rawn tel tur zawng zawngte tan Champhai District chhung a Rural Development Block 4 hming a Registration Counter siam ah mahni hming leh khua ziahluh theuh tur a ni a.

Hemi bakah hian Khuallian tur Chief Minister Pu Lalthanhawla lo thlen hun ah Champhai District Head of Office te chuan kim taka lo hmuah tur a rel a ni. Champhai District in Mizorama ODF District hmasa ber nihna mellung pawimawh tak lawmna ti hlawhtling tur hian mahni chanvo theuh hlen tura infuihna hun hman a ni bawk.