Vawiin chawhma dar 10:30AM khan Mara rama missionary te chenna Saikao khuaah Siaha District Project Office, RMSA hnuaia sak Gov't Mara High School ,Strengthening Building chu Pi Marilyn Rualzakhumthangi,SDO(S) in a hawng.

Vawiin RMSA hnuaia High School Strengthening building cheng nuai Rs.32.25 senga sak hawnna inkhawm hi Pu Solomon N.Beihlotha, Coordinator( Common intervention) RMSA,Siaha in a kaihruai a,Pi Marilyn Rualzakhumthangi, SDO(S) chu khuallian a ni.

Khuallian Pi Marilyn chuan thu sawiin, Kan Mara ram a khaw pawimawh tak mai, Missionary ten chanchin tha an rawm thlenna leh lu nghahna hmun ngeia High School building tha tak mai kan nei thei hi a vanneih thlak tak meuh meuh a ni, a ti a.RMSA project hi kum 2009 atang khan India ram pumah kalpui tan niin, hei hian a tum ber chu High School lutrual kum 14-16 ten sikul an luh vek theih nan te, India ramin zirna kawnga nasa taka hma a sawn a,zirlai naupang tin ten rualkhai taka hmasawnna lamtluang an zawh vek theih nan te a ni. Ram hmasawnna bulthut chu Education atanga intan a nih avangin, kan India ram ropui tak hian kan Siaha District chhungah ngei pawh hian kum 2009 atanga tun inkarah hian RMSA School pawh 7 lai din tawh a ni a, Strengthening building pawh Gov't school 9 -ah sak zawk tawh a ni, a ti bawk.

Pi Marilyn chuan he school leh building tha tak hian zirlai naupang tha tak tak nakin lawka Kohhran, Ram leh khawtlang innghahna tling a chher chhuah teuh ka beiseia, chu mi atan chuan duhsakna ka hlan bawk a che u, a ti bawk. Vawiin programme-ah hian Pu Hunlawmawma, Coordinator(Finance &Account) RMSA in technical report a pe a, Pu T.Chatlua,DDPC,RMSA,Siaha district leh Pu HC.Shield Khai, Chairman Joint VC Saikao ten thusawina hun an hmang bawk. Rev.AZ Beirakaw, Gen.Secretary CCIM. Hqrs in Devotion hmangin,Pu Herbert B.Mathipi, President MSO Sub.Hqrs Saikao in lawmthu sawina in he hun a khar ta a ni.