1922/2023-2024

Aizawl the 18th September, 2023: Government Aizawl North College (GANC) 34th Annual College Week Closing chu vawiin khan Vanapa Hall, Aizawl-ah hman a ni a. Art & Culture Department changtu Minister Pu R. Lalzirliana chuan khuallian niin a hmanpui a, Zoawi Cultural Club, GANC hnenah an mamawh phuhruk nan cheng 2000/- a pe.

Khuallian chuan thu sawiin GANC-in hmani lawka Coral Jubilee (Kum 35-na) hmang theia an awm nachhan chu tuna faculty leh zirlaite mai bakah, hun hmasa lama faculty leh zirlai lo awm tawhte inpekna leh thawhrimna zar liau liau a ni a, college tan theihtawp lo chhuah chhunzawm zel turin a chah a. College week hi zirlaite tan chuan college an kal hun chhunga hun nghahhlelhawm ber leh phurawm ber a nih angin an thiamna hrang hrang leh talent hrang hrang pho chhuahna hun remchang tha tak a ni tih hriain an talent neih hlu tak tak lo tipung zel a, college an chhuahsan hnuah pawh chhawr tangkai zel turin duhsakna a hlan. Thiamthil nei tha te din chhuahna khawvelah kan awm mek a, chuvangin college zirlaite chu an zirlaite thlauhthla si lovin, an zirlai piahlamah pawh thiamna um zel turin a chah a. College Week chu talent pho chhuahna a nih rualin zirlaite tan thawhhona, sportsmanship leh discipline zirna hun remchang tak a ni bawk tiin “Nakinah chuan hna te neiin, midang nen inla thawhho vek a tul dawn a. Tuna zirlai innih lai hian, mahni invawngin, hriselna ngaipawimawhin, nun in-uluk a tul em em a. Zirlai, a zirlai aia ruihtheihthil lam buaipui chu ram leh hnam tan hnawksak a ni a, chutihrual chuan mahni phak tawka inpekna tak tak rilru nen rim taka zir a, tihram hram thin chu kan ram tana malsawmna a ni a, kan ramin hma lam kan pan zel theih nan chutiang ang zirlai chu kan mamawh a ni” a ti.

Kan thalaite hian kan hnamzia chi hrang hrang, kan culture, kan customs te, traditions kan tih te hi hlut nachang hriat a pawimawh hle tiin khawvel hnampui zawk leh upa zawkte chuan an culture an ngaipawimawh em em a, tawng leh hnamzia humhalh hi hnam ropuite tihdan a ni a. Mahni hnam rohlute ngaipawimawh lo apiang chu chimralin an awm thin tiin zirlaite chu College inkal chhung hian eng emaw hnam lam pakhat tal thiam tum theuh a, Education leh Culture hi thil kalkawp tlat a nih avangin education tluantling chuan culture lam zirna a keng tel ngei ngei a, chutiang bawkin culture chu kan tuia kan zir loh chuan zawi zawiin a bo mai thin a ni a ti bawk.

Prof. S Haukhanlian Mate, Principal, GANC chuan kalkhawmte lawmna thu a sawi a. Zirlaite chu Week zawh a nih rualin an zirna lamah rilru leh tih takzeta tan la thar leh turin a chah. Joseph Lalruatdika, Games & Sports Secretary, Students Union chuan College Week report a pe a. Week chhung hian sports discipline hrang hrang a inelin tunah hian faculty 37 leh zirlai 1250 vel awmin house pali (4)-ah an inthen a, overall champion house chu Blue House an ni.

Week kharna inkhawm hi Joseph Hmingropuia, Vice President, Students Union chuan kaihruaiin Mr. K. Vanlalthaa, Vice Principal, GANC-in lawmthu sawina hun a hmang bawk a ni. Chawhnu lamah College MISS leh MISTER thlanna hun bakah Beat Contest hun an hmang bawk.