4003/2022-2023
Dated Aizawl the 27th March 2023: He World Theatre day hi Aizawl ah Assembly House Annexe,Conference Hall a hman ve niin he ni puala khuallian a sawm Art and Culture Minister Pu R Lalzirliana chuan thusawiin, Mizo Drama society chu pawl naupangte nimahse pawl changtlung leh hma la chak tak an ni, a ti a. UNESCO chuan 1948 khan international theatre Institute chu din in chu pawl ITI chuan 1962 ah World Theater Day hi an hmang tan a ni, a ti.
Minister chuan Theatre chuan a huamzau hle a ni, a ti a. Abikin performing art phei chu Mizo te thiam chi tak,kan nun a bet tlat a ni, a ti a, chu chu kan zai leh hnam lam te hian a ti chiang a ni, a ti.
Khuallian chuan lemchan lamah duhthusam in kan la thleng sang tawk lo a ni, a ti a, amaherawhchu tun hnai kum 5 chhung erawh chuan hmasawnna kan hmu chho zel a, hmanrua lamah leh a changtute pawh talent nei tha tak tak an awm chho a, a lawmawm hle a ni, a ti.
Minister chuan reilo te ah lemchan chu eizawnna tlak a nih a la beisei thu sawiin, Mizo Drama Society chu theihtawp a hma la zel turin a fuih a. Mizo drama chhuakthar tur te chu hnam zia leh nunphung pho chhuah na lam a tam thei anga zeh tel theih ni thin se a tangkai dawn hle a ni, a ti a. Lemchan chu mi rilru hneh tak a nih avangin kan thuziak leh kan chan danah te kan fimkhur a pawimawh a ni, a ti bawk.
He World theatre Day ah hian Mizo Drama Award 2023 semna neih nghal niin Award hi Dr Laltluangliana Khiangte hnenah hlan a ni a. He Award dawngtu Dr Laltluangliana Khiangte chuan thusawina neiin World theatre day theme chu 'Theatre and a culture of Peace ' tih a ni, a ti a, World Theatre day chuan thil mawi(Art) chu khawvel pumah vawrh darh a tum a ni, a ti. Mizo thalai kalkhawmte chu thuziak leh lemchan ah hmasawn chho zel tura tan la tur in a fuih bawk a ni.
He World Theatre Day lawmna Aizawl a hman hi Mizo Drama Society,Department of Mizo and Culture studies,ICFAI University,Department of English ICFAI University leh Department of Mizo, Mizoram University te tangkawp a buatsaih niin, Mizo Drama Society President Dr Lalnunpuia Renthlei in hun a kaihruai a,' Mizo Audio Drama,' Mizo Drama Society buatsaih chu Art and Culture Minister in tlangzarhna a nei nghal bawk a ni.
Mizo Drama Soiety hi 27 November 2020 ah din niin thuziak leh lemchan khawvel a mizo te hmasawn theih nan kawng hrang hrang in hma a lo la tawh thin a ni.
Attachment
- Loading attachment...
