4004/2022-2023

Kolasib dated 27th March 2023: Zanin khan Mizoram Football Association leh Kolasib District Football Association tangkawp buatsaihin Diakkawn YMA Hall, Kolasibah Inter District Junior Boys (Under 17) Football Championship 2023 chhuih hawnna hun neih a ni a. Minsiter Pu K.Lalrinliana chu Khuallian niin Pu Lalthlana Ngente, Finance Secretary, KDFA chuan hun a kaihruai a ni.

Pu K.Lalrinliana, Minister, Food, Civil Supplies & Consumer Affairs Department chuan MFA leh KDFA hmalakna a Mizoram chhung a district zawng zawng football hmanga inelna felfai leh thianghlim huaihawt thei a Kolasib district thlan a ni chu lawmawm a tih thu sawiin hriselna ngaih pawimawh leh ruihhlo lak a fihlim tur a inthunun theihna nei  tur a intihhmuhna hun țha a hmang turin infiammi kalkhawmte chu a chah a. Infiamna chu eizawn nan te, taksa insawizawi nan te mi tam takin an hman țhin thu Minister chuan sawiin infiamna khelmual chu inpawh nan, inpumkhat nan leh țhianțha siam nan pawh a hmun țangkai a nih thu a sawi. Ram chuan ri nei țhin mahse inunauna chuan ramri a neih ve loh thu Pu K.Lalrinliana chuan sawiin Inter District Junior Boys Football Championship 2023, Kolasiba buatsaih chuan Mizoram district hrang hranga țhalai Football ngainatute kaltlang hian inpumkhatna leh inunauna țha lehzual a hrin chhuah ngei a beisei thu a sawi bawk a ni.

Zanin Diakkawn YMA Hall, Kolasiba Inter District Junior Boys Football Championship 2023 chhuih hawnna hun ah hian District hrang hrang atanga infiammi leh hruaitute Inhmelhriattirna hun te, inelna thianghlim nei tur a thutiam lakna te leh inelna kalpui chhunga MFA-in a țul apianga hman tur team tin tan a sumfai an ruahmante semchhuahna hun hman a ni.

Mizoram Inter District Junior Boys Football Championship 2023, Kolasiba neih tur hi Regional Sports Training Centre, Saidan leh Kolasib Staduim, Project vengah March ni 28 chawhma atanga kalpui țan tur a ni ang a. District tin aiawh Team 11 ten ni 28, March atanga ni 5, April 2023 thleng hian match 18 kaltlangin inelna hi an nei dawn a ni.