4005/2022-2023

Champhai, the 27th March, 2023: Kum tina buatsaih thin Mizoram pum huam District hrang hrangte volleyball hmanga inelna, Mizoram Volleyball Association (MVA) Inter District Volleyball Championship- 2023, a tum 19-na chu zanin dar 8:00 khan Kahrawt Community Hall-ah hawn (spike off) a ni a. Spike off program hi Law & Judicial Minister Pu T.J. Lalnuntluanga chuan khuallian ni a hmanpuiin Inter District Volleyball Championship- 2023 chu a hawng a ni. He hunah hian Health & Family Welfare Board Vice Chairman Dr. ZR Thiamsanga, MLA chu khualzahawm a ni.

Khuallian Law & Judicial Minister Pu T.J. Lalnuntluanga chuan Mizoram pum huap Volleyball Championship lian tham tak Champhaia nghah a ni leh he hun hmanpui tura sawm a ni chu lawmawm a tih thu a sawi a. Thalai kalkhawmte chu ram leh hnam hmangaihna dik tak neih tum tur leh, hlemhletna hrang hrangte do tlat turin a chah a. Khawvel changkang leh danglam zelin infiamna huangah pawh hmasawnna nasa tak hmuh tur a thlen thu tarlangin, tun hun kan thlen theih nana theihtawp chhuahtu hrang hrangte kan ngaihhlut thiam erawh a tul hle a ni, a ti a. Kum sangbi tel lo changkang tawhte nena intehkhin mai zel loin, tun dinhmun atanga hmasawn zel tura tanlak tlana inthurual a pawimawh hmasak thu a sawi a. Ministry of Minority Affairs hnuaia Pradhan Mantri Jan Vikas Karyakram (PMJVK) project kaltlangin Champhai District-a volleyball tihhmasawn nan hmun 53 ah nuai 2,280.42  senna tur project siama thehluh a nih thu a sawi a. Tunhnai maiah Sawrkar laipui Minority Affairs Minister Pu John Barla hmuin Champhai tan Volleyball Indoor Stadium siam tura dilna thehluh a nih thu leh ngaipawimawha bawhzui a nih thu a tarlang bawk.

Pu T.J. Lalnuntluanga chuan sports discipline hrang hrangte thuikhawmtu State Sports Council leh District Sports Committee tangkai taka hman a nih theih nan tih chak leh thuam that kawngah theihtawp chhuah tlan a pawimawh thu a sawi a. Kalkhawmte chu volleyball hmangin hlimna leh hriselna thlen theih a nih thu midangte hrilhtu leh lantirtu nih tum theuh turin a fuih a; taksa sawizawi chuan mi a ti hrisel a, damdawi senna tur tam tak min pumpelh tir thei a ni, a ti a. Volleyball khel thiam kalkhawmte chu infiammi thinlung thianghlim tak pu tur leh, chungnunna rilru neia intihsiakna hmachhawn tur te, hnam dang lakah indahhniam bik mai lova tumruhna nena theihtawp chhuah zel tum turtein a fuih a. Hmabak eng tak an nei tih hre tura chahin, ze nghet tak leh tik takzetna thinlung nei tura fuihin, MVA Inter District Volleyball Championship 2023 chu a hawng a ni.

Khualzahawm Health & Family Welfare Board Vice Chairman Dr. ZR Thiamsanga chuan District hrang hrang atanga volleyball khel thiam Champhai pantute thinlung taka a lo lawm thu a sawi a. Covid-19 hrileng avanga hmasawnna ruhrel siam a harsat lai pawhin Sawrkarin thalaiten infiamna kawng hrang hranga hma an sawn theih nan tiin theihtawp a chhuah thu a sawi a. Special Assistance to State for Capital Investment (SASCI) kaltlangin Champhai tan volleyball court tha tak siam tum a nih thu leh Chhangphut Field-ah zana inkhelh theih nan flood light dah tum a nih thu a sawi a. Mizo zingah thangthar lian leh hrisel tak tak an chhuah mek zel thu tarlangin, thalaite chu national level mai nilo, international level thlenga lang tham thei tura tan la sauh sauh turin a fuih a. Ruihhlo leh a kaihhnawih laka inthiar fihlim tur te,  insumtheihna neia rilru leh taksa tih hrisel nan sports discipline hrang hrangte uar zawka tuichilh turin a fuih a. PMJVK kaltlangin Champhai District chhungah sports infrastructure-te tih changtlung tum a nih thu a sawi bawk a. Volleyball player-te chu Champhai an cham chhunga hun nuam tak hmang tur leh harsatna an neihte thuneitute hnena thlen hreh lo turin a chah a ni.

Spike Off Program-ah hian Organising Committee Chairman Pu James Lalrinchhana, Champhai District Bawrhsap chuan kalkhawmte lawmna thu a sawi a. Mizoram Volleyball Association (MVA) aiawhin Pu RK Hmingthanga, Joint Secretary-in thu a sawi a. Pi Laldinpuii Colney, Executive Member, MVA in technical report a pe a. Pu James Lalruatkima Pachuau, General Secratary, Champhai District Volleyball Association (CDVA) in lawmthu sawiin hun a khar a ni.

Mizoram Volleyball Association 19th Inter District Volleyball Championship - 2023 hi March ni 27 aṭanga 31 chhung hian Champhai Kahrawt Field-a Volleyball Court pahnihahte chhun leh zana khelh a ni ang. Tun tum hi Champhaiin Inter District Volleyball Tournament a thlen tum hnihna tur a ni a. District zawng zawngte an tel kim thei a, Mipa Team 11 leh Hmeichhe Team 9 te an tel a ni.

Vawiin khan Mipa Team match hnih khelh niin, result kimchang hetiang hi a ni:

Saitual District 3-2 Lawngtlai District

Champhai District 3-2 Aizawl District