3288/2023-2024

Aizawl, the 9th January, 2024: Vawiin chawhnu dar 1:00 khan Art & Culture Minister Pu C. Lalsawivunga hovin Chapchar Kut 2024 lawm dan tur chungchanga pawimawhte thlirlawkna Art & Culture Department hotute'n Minister Pisa, MINECO-ah an nei a. He hunah hian Chief Minister kaihhruai Chapchar Kut Organising Committee thutkhawm neih huna thlen tur rawtna leh pawimawh hrang hrangte chipchiar taka sawiho a ni.

Art & Culture Minister Pu C. Lalsawivunga chuan Chapchar Kut chu mizote'n kut kan neih tlemte zinga pawimawh leh ngaihven hlawh tak a nih thu sawiin, hnam ziarang leh nunphungte chawinun leh vawnhim nana hman tangkai a tul thu a sawi a. Kalkhawmte chu Chapchar Kut lawm tawh thin dan aia tha leh inher danglam ngaite a awm a nih chuan inthlahrung hauh lova thurawn pe hreh lo turin a chah a. Zau zawka khawvel hriat leh hmuh theih tura mizo hnam ziarang leh nunphungte pho chhuah a nih theih nana hmalak dan kawng ngaihtuaha tanlak tlan a pawimawh thu a sawi bawk.

Vawiin thutkhawmah hian Chapchar Kut lo hman thin tawh dante leh NGO te nena thawhhona hnuaiah hlawhtling taka Chapchar Kut lawm thin dante ngaihthlak a ni a. Chapchar Kut Organising Committee chungchangte, ngaihtuahna zau zawk senga Chapchar Kut lawm a nih theih dan turte, senso ngaite, lawm hun chhung turte, lawmna tur hmunhma, lawm dan tur program duan chhin leh kut kentel pawimawh dang Food Stall, Exhibition Stall, Photo Gallery/Art Exhibition, Flower Show, Zokhua leh a kaihhnawih pawimawh dangte pawh sawiho a ni a. Chapchar Kut chu mizo nun zemawi thangtharte hnena zirtir nana tangkai taka hman thiam a tul thu tarlan a ni a. Rawtna siam leh tul ni a hriatte chu thutawp siamtu tur Chief Minister kaihhruai Chapchar Kut Organising Committee thutkhawm neih huna pawmpui tura chhawpchhuah ni se tih a ni.

He hunah hian Art & Culture Department Secretary Pu Lalthansanga, Director Pi Carol VLMS Dawngkimi leh Department hotu dangte an tel a ni.